Австрия канцлери коррупцияда айбланиб истеъфога чиқди
Австрия канцлери Себастян Курц ўз лавозимидан кетишини эълон қилди. Бир неча кун олдин мамлакат прокуратураси унга қарши коррупция айбловини қўйиб тергов бошлаган эди.
Прокуратура у ва унинг бир неча шерикларини Австрия таблоидларидан бирининг таҳририятига ўз сиёсий фаолиятини қулай тарзда намойиш этиш ва буни амалга ошириш учун давлат ҳисобидан пул тўлаганликда гумон қилмоқда.
Шанба куни Себастян Курц телевидение орқали чиқиш қилди ва сиёсий инқироз ҳамда бетартибликнинг олдини олиш учун бу лавозимни бўшатаётганини эълон қилди.
Жума куни Курц Австрия халқ партияси ва Яшиллар коалицияси иборат Австрия ҳукумати том маънода қулаш арафасида эди. Яшиллар етакчиси Вернер Коглернинг сўзларига кўра, Курцга қарши олиб борилган тергов уни ҳукуматда номақбул шахсга айлантиради.
"Бизга барқарорлик керак", дея таъкидлади 35 ёшли Себастян Курц ва мамлакат пандемияга қарши курашаётган пайтда, Австрия сиёсий инқирозга тушиб қолишига йўл қўйиш масъулиятсизлик бўлади, дея қўшимча қилди.
Себастян Курц Ташқи ишлар вазири Александр Шалленбергни канцлер этиб тайинлашни таклиф қилди, унинг ўзи эса Австрия халқ партиясининг етакчиси ва унинг парламентдаги фракцияси раҳбари бўлиб қолади.
"Яшиллар" ҳали Шалленбергни канцлер сифатида қабул қиладими ёки йўқми, бир қарорга келишмаган.
Шу билан бирга, Курц прокуратура томонидан қўйилган даъволарни инкор этди ва журналистларга пора бўйича ҳар қандай айбловни ёлғон эканлигини айтиб ўтди.
