Антониу Гутерриш: "Иккинчи муддатга қайта сайланишга қарши эмасман"

БМТ бош котиби Антониу Гутерриш иккинчи муддатга қайта сайланишга розилик берди. Бу ҳақда унинг матбуот котиби Стефан Дюжаррик брифингда маълум қилди.

Антониу Гутерриш БМТ Бош Ассамблеяси раисининг сўровига «агар ташкилот аъзоларининг хоҳиши шундай бўлса, иккинчи муддатга қайта сайланишга қарши эмасман», дея жавоб берган. Шунингдек, у хатни БМТ Хавфсизлик Кенгаши раисига ҳам юборган.

Дюжаррикнинг таъкидлашича, Антониу Гутерриш бу масалада минтақавий гуруҳ раҳбарлари ва Хавфсизлик кенгашининг доимий аъзолари билан ҳам маслаҳатлашган.

Антониу Гутерриш номзоди Хавфсизлик Кенгашининг тавсиясига биноан 2016 йил 13 октябрда овоз беришларсиз БМТ Бош Ассамблеяси томонидан маъқулланиб, 2017 йил 1 январдан ўз лавозимига киришган эди.

Антониу Мануэл де Оливейра Гутерриш 1949 йилда Лиссабонда таваллуд топган. У Олий техника институтида муҳандислик иши ва физикани ўрганган, 1971 йилда олий таълим муассасасини тугаллаб, катта ўқитувчи лавозимида академик карьерасини бошлаган.

Тақводор католик Гутерриш 1974 йилда социалистик партияга аъзо бўлган ва тез орада ўзини буткул сиёсатга бағишлашга қарор қилган. Социалистларнинг бош котиби лавозимида уч йил хизмат кўрсатгач, Португалия бош вазири этиб сайланган. У ҳукумат раҳбари лавозимида 2002 йилга қадар 7 йил давомида фаолият юритади.

2005 йилда португал, испан, инглиз ва француз тилларида эркин суҳбатлашувчи Гутерриш БМТнинг қочқинлар иши бўйича олий комиссари лавозимини эгаллайди.

Унинг раҳбарлик йиллари давомида Женева бош қароргоҳидаги амалдорлар сони қисқарган, шундай бўлсада, экспертларнинг таъкидлашича, агентликнинг ўз ходимларини «қайноқ» нуқталарга жўнатиб, халқаро инқирозларга ўз вақтида муносабат билдириш хусусияти яхшиланган.