Ана холос! Ташқи қиёфасига маҳлиё эркаклар бепушт бўлиб қолиши мумкин

Олимлар эркакларнинг ўз ташқи кўринишини мукаммаллаштиришга муккасидан кетиши ва уларнинг фарзанд кўришда қийналиши ўртасида алоқадорлик борлигини аниқлашди.

Атлетик қиёфани шакллантириш, соч тўкилишига қарши воситалар эркакнинг насл қолдириш салоҳиятига кескин салбий таъсир қилади. Ушбу ҳолат Моссман-Пейси парадокси деб аталади.

“Репродуктив саломатлигидан шикоят қилиб келувчи бир қанча эркакнинг ташқи кўринишига эътибор бердим – улар соғлом, жуда чиниққан йигитлар эди”, – дейди АҚШдаги Браун университети тадқиқотчиси Жеймс Моссман. У асосан бодибилдинг билан шуғулланувчилар қабул қиладиган анаболик стероидларнинг таъсири ҳақида илмий иш қилган.

“Бундай эркаклар супермендек кўриниш, мушакларни ўстириш учун дарров стероидларга югуришади, – дейди олим. – Шу билан улар эволюцион боши берк кўчага кириб қолишади. Уларда тирик сперматозоидлар сони камая боради”.

Анаболик стероидлар эркак танасида тестостерон гормони функциясини ўзига олади ва шунинг учун мушак массасини ўстиришга таъсир қилади.

“Буни қарангки, эркаклар аёлларга чиройли кўриниш учун соатлаб вақтини тренажёр залларида ўтказишади, бироқ амалда уларнинг жинсий қуввати туша бошлайди”, – дейди Шеффилд университетидан профессор Аллан Пейси.

Анаболик стероидлар гипофизга таъсир қилади, бунда эркакнинг мояклари керагидан ортиқ ишлаётгани ҳақида сигнал боради. Оқибатда гипофиз икки гормон – фоллитропин ва лютеотропинни ишлаб чиқаришни сусайтиради. Бу икки гормон эса эркак уруғини ишлаб чиқаришда фаол қатнашади.

Тадқиқотчилар, шунингдек, соч тўкилишига қарши дорилардан фойдаланувчи эркакларда ҳам шу жараён кузатилишини айтишади.

Масалан, соч тўкилмаслиги учун финастерид қабул қиладиганлар соч тўкилишини камайтиришлари мумкин, лекин унинг асорати сифатида бепуштлик ёки жинсий заифлик пайдо бўлади.