Алмазбек Атамбаевга яна айблов қўйилди
Қирғизистон бош прокуратураси мамлакатнинг собиқ президенти Алмазбек Атамбаев ва унинг 13 нафар тарафдорига 2019 йилнинг 7-8 август кунлари Қўйтош қишлоғидаги тўқнашувлар бўйича айблов эълон қилди.
Айблов хулосаси 491 бетдан иборат бўлиб, унда ҳокимиятни куч билан эгаллаб олишга уриниш, қотиллик, ҳуқуқ-тартибот органлари ходимларига суиқасд, оммавий тартибсизликлар уюштириш ва бошқа жиноятларга тегишли фактлар келтирилган.
Қирғизистон Миллий хавфсизлик қўмитаси 2019 йилнинг августида Бишкек яқинидаги Қўйтош қишлоғида Алмазбек Атамбаевни қўлга олишга уринди, бироқ собиқ президентнинг тарафдорлари бунга қаршилик кўрсатди. Икки кун давом этган уринишлардан сўнг Атамбаев таслим бўлди. Тартибсизликлар чоғида 225 киши жароҳат олди, махсус хизматларнинг бир ходими ҳалок бўлди.
Алмазбек Атамбаев Миллий хавфсизлик қўмитасининг тергов изоляторида сақланмоқда. У бошқа жиноятлар, хусусан, коррупция ва ноқонуний бойиш бўйича ҳам айбланмоқда.
