Алишер Қодиров Содиқ Сафоевнинг фикрига муносабатини билдирди
Куни кеча Олий Мажлис Сенати раисининг биринчи ўринбосари Содиқ Сафоев Kun.uz мухбирига берган маълумотга кўра агар янги Конституция қабул қилинса, ҳамма қатори президент Шавкат Мирзиёевга ҳам сайловларда қатнашиш имкони яратиб берилишини, бу ҳуқуқдан фойдаланиш ёки фойдаланмаслик эса шахснинг ўзига ва сиёсий партиясига ҳавола эканини маълум қилган эди. Содиқ Сафоевнинг фикрига Ўзбекистон Республикаси Олий Мажлиси Қонунчилик палатаси Спикерининг ўринбосари, “Миллий тикланиш" ДП МК раиси Алишер Қодиров шундай муносабат билдирди:
Конституцияга ўзгартириш киритиш зарурати халқимиз томонидан кенг қўллаб қувватланаётган сиёсий-иқтисодий ислоҳотлар тўлқинида юзага келди.
Инсон ҳуқуқ ва эркинликлари, қадриятлар, маданий-тарихий ва маънавий меърос, тарбия ва таълим соҳасида фуқаролар олдида давлатни жиддий масъулият олиши кутилаётган конституцион ислоҳотларни тўлиқ қўллаб-қувватладик. Конституцион ислоҳотлар асосида юзага келиши мумкин бўлган янги ҳуқуқий макон масаласи халқаро, умумеътироф этилган норма бўлганлиги учун муҳокама қилишда фойда кўрмаяпман. Шу билан бирга, Ўзбекистондаги ёш демократияни асрий демократияларнинг мезонлари билан ўлчашга қаршиман.
Сўнгги йилларда эришилган сиёсий-иқтисодий эркинликларни мустаҳкамлаш ва ривожлантириш учун барқарорликка эришиш, ислоҳотларни ортга қайтмайдиган ҳаракатга айлантириш халқимиз учун ҳам, давлатимиз учун ҳам устувор мақсад бўлиши керак деб ўйлайман.
Қолаверса, демократиянинг фундаментал мезони - 22 миллионга яқин овоз бериш ҳуқуқига эга ватандошларимиз нима деса шу бўлади. Биз Ўзбекистонни эркин, барқарор ва тинч ривожланиши тарафдоримиз.
