ХОҚ раҳбари лавозимига кимлар номзод бўлиши мумкин?
Тез орада Халқаро Олимпия қўмитасининг (ХОҚ) янги президенти сайланади. Ўз навбатида, Қўмитанинг амалдаги раҳбари Томас Бах бу лавозимни тарк этишини тасдиқлади.
Ҳозирча Томас Бах ўрнига фақат битта номзод, яъни Халқаро енгил атлетика федерациялари ассоциацияси раҳбари Себастьян Коунинг исми маълум. У 2025 йил март ойида бўлиб ўтадиган сайловларда иштирок этиш имкониятини кўриб чиқаётганини очиқ айтди. Бу ҳақда Sport.kz ёзмоқда.
Париж Олимпиадаси ёпилишидан олдин журналистлар Себастьян Коудан март ойидаги сайловларда иштирок этиш имкониятлари ҳақида сўрашган. Ўз навбатида, “агар бу лавозимга сайланиш учун тегишли имконият бўлса, буни албатта кўриб чиқишини” таъкидлади. BBC ва The Guardian каби Британия ОАВлари унинг баёнотини ХОҚ президентлигига номзодини қўйишга тайёр эканлигидан далолат берувчи “аниқ аломат” сифатида эълон қилмоқда.
Хусусан, Себастьян Коу аввал ҳам шундай баёнотлар билан чиққан эди. Қолаверса, бу йилги Олимпиада вақтида ҳам у ХОҚнинг жазоирлик ва тайванлик спортчилар Имон Халиф ва Лин Ютингнинг бокс турниридаги иштирокига нисбатан муносабатидан норозилигини очиқ айтди. Ушбу спортчилар Халқаро бокс ассоциацияси (IBA) томонидан гендер тестлари асосида мусобақалардан четлаштирилди. Иккаласи ҳам Парижда олтин медални қўлга киритди. Коунинг сўзларига кўра, ХОҚнинг уларга нисбатан сиёсати “аниқ ва тушунарли” бўлиши керак.
ХОҚ раҳбари лавозимига сайлов кампанияси ҳақида гапирар экан, Себастьян Коу 2025 йилги сайловларда рақобат жуда юқори бўлишини айтди.
Мутахассисларнинг фикрича, Томас Бах ўрнига номзодлар орасида ХОҚ вице-президентлари Николь Хувертс ва кичик Хуан Антонио Самаранч, шунингдек, ташкилотнинг спортчилар комиссиясини бошқараётган Кирсти Ковентри бор.
Эслатиб ўтамиз, Николь Хувертс (Аруба) синхрон сузиш спортчиси сифатида танилган. Николь 2006 йилдан буён Халқаро Олимпия қўмитаси аъзоси ва ҳозирда ХОҚ Ижроия қўмитаси аъзоси. 2021 йилнинг июлида у ХОҚ вице-президенти этиб сайланган.
Кичик Хуан Антонио Самаранч (1959 йил 1 ноябрда туғилган) — Испания спорт арбоби ва халқаро олимпия ҳаракати арбоби. 2001 йилдан буён Халқаро олимпия қўмитаси аъзоси.
ХОҚ раҳбари лавозимига номзод Кирсти Ли Ковентри Сьюард зимбабвелик сузувчи ва сиёсатчи, халқаро олимпия ҳаракати арбоби, икки карра Олимпия чемпиони, бир қанча жаҳон рекордларини ўрнатган.
Франциянинг L'Equipe нашри хабарига кўра, мазкур сайловда Франция Миллий олимпия қўмитаси ва Халқаро велосипедчилар иттифоқи (UCI) президенти Давид Лапартьян иштирок этиши мумкин.
Давид Лапартьян 1973 йилда туғилган. 2005 йилда у Халқаро велосипедчилар иттифоқи (UCI) бошқарув қўмитасига сайланган. 2009 йилнинг февраль ойида у Франция велоспорт федерацияси президенти бўлди, 2013 йил 23 февралда эса бу лавозимга қайта сайланди. 2013 йил март ойида у Европа велосипедчилар иттифоқи президенти этиб тасдиқланди, ўша йилнинг 28 сентябрида эса Халқаро велосипедчилар иттифоқи вице-президенти бўлди. 2021 йилда у янги тўрт йиллик муддатга UCI президенти этиб сайланади.
Эслатиб ўтамиз, Томас Бах Халқаро Олимпия қўмитасини 2013 йилнинг кузидан бери бошқариб келмоқда. 2021 йилда у тўрт йиллик муддатга қайта тасдиқланди, охирги марта Олимпия Хартияси шартларига кўра бу лавозимга сайланган эди. Т. Бахнинг ўзи ХОҚ Ижроия қўмитасидан ташкилот раҳбари сайловини 2025 йилнинг 26 мартига белгилашни сўраган. Янги президент келгуси йилнинг 24 июнида ўз лавозимига киришади.
