Виртуал (онлайн) фирибгарлик учун қандай жавобгарлик мавжуд?
Савол: Интернетда қизиқ бир статистик маълумот ўқиб қолдим. Унга кўра, ҳар секундда дунё бўйича 5-7 нафар фуқаролар тўлов карталари воситасида виртуал фирибгарлик жабрланувчисига айланаркан. Бу жиноят Ўзбекистонда ҳам кейинги йилларда ахборот технологиялари ривожи, виртуал (онлайн) хизматлар кўпайгани сари ҳисоб рақамдан, пластик картадан фирибгарлик йўли билан виртуал пул ўмариш учраб турибди. Ахборот технологияларидан фойдаланиб содир этилаётган вирутал (онлайн) фирибгарлик учун миллий қонунчилигимизда жавобгарлик кучайтирилганми?
Исми ва манзили сир тутилди
Дарҳақиқат, айрим фуқароларимизнинг онлайн тўловлардан фойдаланиш хавфсизлигидан бехабарлиги, бугунги кунда айниқса olx.uz ва бошқа савдо платформаларидан, Телеграм тармоғидаги турли бот ва каналлардан фойдаланишда виртуал билим ҳамда онлайн кўникмалари етарли эмаслиги турли вазиятларда фирибгарлик жиноятини содир этилишига шарт-шароит яратмоқда.
Фирибгарлик – бу ўзганинг мулкини ёки мулкка бўлган ҳуқуқини алдаш ёки ишончни суиистеъмол қилиш йўли билан қўлга киритишдир. Амалдаги Жиноят кодексининг 168-моддасида фирибгарлик ва унинг турлари учун жавобгарлик ва жазо белгиланган.
Саволнинг жавобгарлик кучайтирилганми деб қўйилган қисмига келсак, 2022 йил 19 октябрда “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун Президент томонидан имзоланди. МазкурҚонун билан Жиноят кодексига киритилган ўзгартишларга кўра, фирибгарликни ахборот тизимидан, шу жумладан ахборот технологияларидан фойдаланиб (виртуал)содир этганлик учун жавобгарлик кучайтирилган.
Қонун билан Жиноят кодексига киритилган ўзгартишларга кўра, фирибгарликни ахборот тизимидан, шу жумладан ахборот технологияларидан фойдаланиб содир этганлик учун – БҲМ (базавий ҳисоблаш миқдори) нинг 300 бараваридан 400 бараваригача жарима ёки 2 йилдан 3 йилгача ахлоқ тузатиш ишлари ёхуд муайян ҳуқуқдан маҳрум этиб 5 йилдан 8 йилгача озодликдан маҳрум қилиш билан жазоланади.
Шунингдек, фирибгарликнинг миқдори, такрорийлиги, содир этган шахслар, содир этиш воситасидан келиб чиқиб жавобгарлик чораси оғирлашиши мумкин.
Акром Арипов,
Олий суд бош консультанти
