Туркия БРИКСга қўшилиш учун расман ариза топширди

Туркия БРИКСга қўшилиш учун аризани расман топширди, деб ёзади Bloomberg портали хабардор манбаларга таяниб. Агентлик суҳбатдошларининг иддао қилишича, мамлакат бу қарорни бир неча ой олдин Европа Иттифоқига қўшилиш бўйича музокаралардаги қатор муваффақиятсизликлар фонида қабул қилган. Мамлакатнинг ассоциацияга қўшилиши масаласи 22-24 октябрь кунлари Қозон шаҳрида бўлиб ўтадиган БРИКС саммитида кўриб чиқилиши мумкин.

Агентлик манбаларига кўра, Президент Ражаб Тоййиб Эрдўғон маъмурияти геосиёсий тортишиш маркази “ривожланган иқтисодлардан узоқлашмоқда” деб ҳисобламоқда.

Уларнинг сўзларига кўра, Туркия БРИКСга аъзоликни Россия ва Хитой билан иқтисодий ҳамкорликни мустаҳкамлаш, шунингдек, Осиё ва Европа ўртасидаги энергетик ҳамкорлик соҳасидаги салоҳиятини рўёбга чиқариш имконияти сифатида кўради.

Агентлик суҳбатдошларининг қўшимча қилишича, аъзолик аризаси қисман Туркиянинг Украинада махсус операция бошланганидан бери Россия томонини қўллаб-қувватлаганидан кейин НАТОдаги ҳамкасблари билан келишмовчиликлари билан боғлиқ.

Июль ойи бошида жаноб Эрдўған Туркиянинг НАТОга аъзолиги “унинг БРИКС ва ШҲТ билан ҳамкорлик қилиш қобилиятига” зид эмаслигини айтди. Ҳозирги кунда ассоциацияга Бразилия, Россия, Ҳиндистон, Хитой, Жанубий Африка, Миср, Эрон, Бирлашган Араб Амирликлари, Саудия Арабистони ва Эфиопия киради. Малайзия ва Озарбайжон аъзолик учун аризаларини расман топширган.