Трамп: «АҚШнинг ҳамма душманлари қўрқувдан қочади»

Трамп: «АҚШнинг ҳамма душманлари қўрқувдан қочади»

АҚШ президенти Дональд Трамп АҚШда 11 ноябрда Фахрийлар куни муносабати билан Нью-Йоркдаги Мэдисон-скверда ўтказилган маросимда Иккинчи жаҳон уруши, Корея, Вьетнам, Форс кўрфази ва Ироқдаги урушлар қатнашчилари олдидаги нутқида АҚШга ҳеч ким қаршилик кўрсата олмаслигини таъкидлаб ўтди.  

“Бизга қарши чиқувчилар АҚШ қуролли кучларининг қудратига қарши ҳеч қандай имкониятга эга эмас”, деб айтган Трамп ва ИШИД етакчиси Абу Бакр ал-Бағдодийни йўқ қилиш бўйича яқинда ўтказилган амалиётни эсга олиб ўтди. “Бир неча ҳафтагина аввал америкалик ҳарбийлар махсус тузилмаси террорчилар яширинган жойга кириб, дунёдаги биринчи рақамли террорчини қилмишлари учун жавоб беришига мажбур қилишди. Америкалик ҳарбийлар туфайли ал-Бағдодий ўлдирилди, унинг ўринбосари ҳам ўлдирилди ва биз улар қўмондонлигидаги учинчи рақамли шахсни ҳам нишонга олганмиз. Уларнинг террорга асосланган ҳукмронлигига чек қўйилди ва бизнинг барча душманлар қўрқувдан қочмоқда”, деб айтган АҚШ президенти. 

Трампнинг таъкидлашича, америкаликларнинг юқори жанговар руҳи “уларга золимларни мағлуб қилишга, фашизм устидан ғалаба қозонишга, коммунизмни барбод қилишга ва террорчиликка қарши курашишга ёрдам берган”. “Фахрийлар куни давлатимиз ўзининг энг муҳим бурчини яна бир бор тасдиқлайди: биз ўз елкаларида жанговар ҳаракатлар оғир юкини кўтарганлар ҳақида ғамхўрлик қилишимиз лозим”, деб таъкидлаб ўтган Трамп.

Фахрийлар куни АҚШ давлат байрами бўлиб, Биринчи жаҳон урушида тинчлик сулҳи тузилган кун - 11 ноябрда барча уруш фахрийлари хотирасига ўтказилади.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!