Тошкентда қиз болага уйланишни ваъда бериб, севишган "эркак", аслида, қиз бола бўлиб чиқди

Виртуал оламдаги танишув баъзан ҳақиқий ҳаётдаги бахт сари етаклаши ҳам мумкин. Аммо бу “ўргимчак тўри”да адашиб қолмасдан, айнан сизга керакли инсонни топиш осон иш бўлмаслиги аниқ. Ижтимоий тармоқлардаги фаол қизлар айрим хавфсизлик қоидаларини унутиб қўйишмаса, қуйидаги каби жиноятларнинг олди олинган бўлармиди?

Ҳолатни яширин равишда видеога олади

Маҳмуд (исмлар ўзгартирилган) “Instagram” ижтимоий тармоғи орқали Дилсора билан танишиб, унга севги изҳор қилади, уйланишини айтади. Қабиҳ ниятини амалга ошириш мақсадида ўзини бетобликка солиб, ҳолидан хабар олиш учун қизни ўзи яшаётган уйига чақиради. Содда қиз йигитнинг гапига ишониб, уйига келганида у билан яқинликда бўлмоқчи бўлган ҳолатни яширин равишда телефонга видеога олади. Бу камлик қилгандек, Дилсора устига кийимини кияётган жараённи ҳам суратга олади. Кейинчалик у мазкур видео ва фотосуратларни Дилсоранинг ота-онасига кўрсатиш, тарқатиб юбориш билан қўрқитиб, ундан бир дона нархи 2.500.000 сўмлик аёллар тилла узуги ва бир жуфт нархи 1.000.000 сўмлик аёллар тилла зирагини қўлга киритади.

Мушугини ҳеч ким пишт демаганидан илҳомланди

Маҳмуд қиздан олган тилла буюмлар билан чегараланмай, жиноий хатти-ҳаракатларини давом эттираверади. Юқоридаги сир сақланиши лозим бўлган маълумотларини ошкор қилиш билан қўрқитиб, бир неча маротаба Дилсорадан бўлиб-бўлиб, турли миқдордаги АҚШ долларларини олади. Унинг мушугини ҳеч ким пишт демаганидан илоҳомланиб, бу ҳақда манзил колониясида жазо муддатини ўтаётган таниши Анварга мақтанади. Улар жиноий тил бириктирган ҳолда қиздан янаям кўпроқ пул ундириш мақсадида турли хил баҳоналарни ўйлаб топишади. Шарманда бўлишдан қўрққан Дилсора уларга ўн ой давомида бўлиб-бўлиб, жами 10.000 АҚШ доллари миқдоридаги пулларни олиб келиб беради. Улар олинган пулларни ўзаро бўлиб олган ҳолда ўзларининг шахсий эҳтиёжларига ишлатиб юборишади.

Ўғрини қароқчи урди

Бу орада Дилсора “Telegram” орқали ўзини гўёки “Фаррух ва Беҳзод” деб таништирган, аслида қиз бола бўлган Нилуфар билан танишиб қолади. У Дилсора билан севги-муҳаббат ҳақида гаплашиб юради, унга уйланмоқчи эканлигини айтади. Онамни совчиликка юбораман, деб Дилсора яшайдиган маҳалласидан суриштиргани ва унинг илгари бошқа йигит билан севишиб юрганини эшитганини, бор гапни ўз оғзи билан рўй-рост айтиб беришини сўрайди ва бунга кўндиради. Дилсора унга аввал Маҳмуд билан севишганлигини, унинг уйига борганида яқинлик қилишган жараёнини суратга олганини, кейинчалик бу видео ва фотосуратларни ота-онасига кўрсатиш йўли билан қўрқитиб, пул олганини гапириб беради. Бундай муҳим маълумотга эга бўлган Нилуфар ҳам ўз тилидан тутилган Дилсорадан пул ундириш фикри туғилади. У қизни мазкур видеоларни ота-онасига кўрсатиш билан қўрқитади. Ўзини пулни олишга келган “Фаррух”нинг синглиси “Ирода” сифатида таништириб, ундан дастлаб 300 АҚШ долларини, сўнгра 400 АҚШ долларини олади. Бел оғритмай пул топишнинг бу усули ёқиб қолгач, Нилуфар Дилсорани қўрқитиб, яна 600 АҚШ долларини талаб қилади ва бу пулни қўлга киритади. Нилуфар шунча олинган долларлар билан таскин топмай, иштаҳаси карнай бўлиб, Дилсорага “Энди 5000 АҚШ доллари берасан, бўлмаса шарманда қиламан”, дейди. Таниши Носирга тегишли машинада пулни олиш учун Дилсоранинг уйига бориб, Носирни “Фаррух” деб таништиради. Дилсора бунча катта пулни бирдан беролмаслигини айтиб, уларга мазкур миқдордаги пулни бўлиб-бўлиб беради. Товламачиларнинг нафси ҳакалак отаётганини кўриб, жиноят ҳақида ички ишлар бўлимига мурожаат қилишга мажбур бўлди. Нилуфар ва Носир ҳеч нарсадан бехабар ҳолда навбатдаги 300 долларни қўлга киритаётган вақтда Тошкент шаҳар ИИББ ЖҚБ тезкор вакиллари томонидан ашёвий далиллар билан қўлга олинди.

Жиноятчиларга жазо тайинланди

Нилуфар ЖК 165-моддаси 2-қисмининг “в” бандида назарда тутилган жиноятларни содир этганликда айбли деб топилиб, 5 йил озодликдан маҳрум қилиш жазоси тайинланди. ЖКнинг 72-моддасига асосан унга нисбатан тайинланган озодликдан маҳрум қилиш жазоси шартли ҳисобланиб, 2 йил синов муддати белгиланди.

Маҳмуд ва Носир ЖКнинг тегишли моддалари билан айбдор, деб топилиб, уларнинг ҳар бирига нисбатан 5 йил, Анварга эса узил-кесил 5 йил 1 ой муддатга озодликдан маҳрум қилиш жазоси тайинланди.

Муҳаммад ҚАЮМОВ,

жиноят ишлари бўйича Мирзо Улуғбек туман суди судьяси,

Лола ШОИМОВА

журналист.