Суиқасдми ёки шунчаки тасодиф: Иброҳим Раисийнинг ўлимига якуний хулоса чиқарилди
Якуний ҳисоботда айтилишича, Эроннинг марҳум президенти Раисий вертолёти об-ҳаво туфайли ҳалокатга учраган.
Эроннинг марҳум президенти Иброҳим Раисий ҳалок бўлган вертолёт ҳалокатига биринчи навбатда об-ҳаво шароити, жумладан қалин туман сабаб бўлган, деди якшанба куни Эрон давлат телевидениеси ҳодиса бўйича якуний тергов ҳисоботига таяниб.
Эрон президенти, олий раҳнамо Оятуллоҳ Али Хоманаийнинг потенциал вориси сифатида кўрилган сиёсатчи Иброҳим Раисий май ойида унинг вертолёти Озарбайжон чегараси яқинидаги тоғли ҳудудда қулаши оқибатида ҳалок бўлди.
«Вертолёт ҳалокатининг асосий сабаби минтақадаги мураккаб об-ҳаво шароити бўлди», — дейилади якуний ҳисоботда.
Эълон қилинган ҳисоботда, Раисий ва унинг ҳамроҳларини олиб кетаётган вертолётнинг тоғга қулаганига қалин туман массаси сабаб бўлган.
Май ойидаги Эрон ҳарбийларининг дастлабки ҳисоботида айтилишича, тергов давомида ҳеч қандай қўпол ҳаракат ёки ҳужум исботи топилмаган.
