Самарқандда ЙПХ ходимлари қаршилик кўрсатган ҳайдовчига электрошокер қўллади
Самарқанд вилояти ИИБ ахборот хизматининг хабар беришича, ҳайдовчи ЙПХ ходимининг погонини юлиб олиб, уни уриб тан жароҳати етказгандан сўнг уни тўхтатиш учун бошқа бир ходим электрошокер ишлатган.
Маълум қилинишича, 2022 йил 31 май куни соат 08:35да вилоят ИИБ ЙПХнинг икки нафар инспектори Паст Дарғом туманида жойлашган «Жума деҳқон бозори» олдида 3.27 йўл белгиси таъсири остига қўйилган транспорт воситаларини планшет мосламасига расмга тушираётганда уларнинг ёнига шу туманда яшовчи фуқаро А.Ч. келиб, «нима сабабдан машинамни фотосуратга олдинг?» деб тортишган.
Тортишув давомида А.Ч. инспекторлардан бирининг погонини юлган ва уни уриб тан жароҳати етказган.
Шундан сўнг фуқаро А.Ч. томонидан содир этилаётган қаршилик ҳолатини тўхтатиш учун инспекторлардан бири хизматда фойдаланиш учун берилган электрошокер мосламасини фуқаронинг чап елка соҳасига қўллаган.
Паст Дарғом тумани тиббиёт бирлашмасининг шу кундаги маълумотномасига кўра, фуқаро А.Ч.нинг чап қўл елка қисмида тери усти қизариши жароҳати мавжудлиги кўрсатилган.
Мазкур ҳолат бўйича Пастдарғом туман прокуратурасининг хизмат текшируви ўтказиш ҳақидаги хати ва ИИВ ШХББ Самарқанд вилояти бўйича бошқармасининг маълумотномаси асосида вилоят ИИБ ЙҲХБ томонидан 7 июнь куни хизмат текшируви ўтказилган.
Текширув давомида РСТEИАМ Самарқанд филиали СТE бўлимининг 1 июнь кунидаги 1399-сон эксперт хулосасига кўра, ЙПХ инспекторининг танасида турли даражадаги тан жароҳатлари борлиги ва улар ўтмас қаттиқ жисмлар таъсирида етказилгани, ушбу жароҳатлар “енгил соғлиқ бузилишига сабаб бўлган тан жароҳатлари” гуруҳига кириши, етказилган вақти 31 май кунига тўғри келиши мумкинлиги кўрсатилган.
Хизмат текшируви давомида, ЙПХ инспекторлари ИИВнинг тегишли буйруқ талаблари асосида ҳаракат қилгани бўйича хулоса қилиниб, хулоса ва тўпланган ҳужжатлар Паст Дарғом тумани прокуратурасига юборилган.
2022 йил 7 июн куни фуқаро А.Ч.га нисбатан Жиноят кодексининг 277-моддаси 3-қисми «г» банди билан жиноят иши қўзғатилиб, Жиноят процессуал кодекснинг 221-моддаси тартибида ушланган.
Қайд этилишича, ҳозирги кунда Паст Дарғом тумани прокуратураси томонидан тергов ҳаракатлари давом эттирилмоқда.
