Россия Хавфсизлик Кенгаши: АҚШнинг Минск жараёнидан чиқиши Москва билан тизимли қарама-қаршиликка олиб келди
Қўшма Штатлар 2014 йилда Минск жараёнидан узоқлашганда Россия билан тизимли қарама-қаршиликка асос солган эди.
Бу ҳақда Россия Хавфсизлик кенгаши котибининг биринчи ўринбосари Рашид Нургалиев “Arguments and Facts” нашрига берган интервьюсида маълум қилди.
“Америкаликлар «Минск-2»нинг қайғули якунида муҳим роль ўйнади: улар келишувларга кафолат бермасдан, бошиданоқ бу ҳужжатга ўз муносабатини кўрсатди. Барак Обама маъмурияти 2014 йилда Минск жараёнидан узоқлашиб, Россия билан тизимли қарама-қаршиликка асос солган эди”, - деди Нургалиев.
Унинг сўзларига кўра, Киевни Париж ва Берлин бошқармаган, унга фақат Вашингтоннинг позицияси муҳим эди.
«Қўшма Штатлар эса Донбассда содир бўлаётган воқеаларга кўз юмиб, аниқ сигнал берди: хоҳлаганингизни қилинг», деб хулоса қилди Хавфсизлик кенгаши котибининг биринчи ўринбосари.
Унинг таъкидлашича, «келишувлар бажарилмаган тақдирда Украинага таъсир қилиш учун ҳеч қандай восита яратилмаган ва бу ёндашув Украина раҳбариятига эркин қўл берган».
Умуман олганда, унинг сўзларига кўра, 2014 йил февралидан бошлаб Қўшма Штатлар бутун Украина устидан амалда назорат ўрнатган, Киев расмийлари эса қарор қабул қилишда ўз мустақиллигини бутунлай йўқотган.
«Ғарбда Киевга босим ўтказишнинг барча воситалари бўлган ва ҳозир ҳам бор. Шу боис, Зеленскийнинг кўкрагини уриб, келишувни бажармасликка шахсан ўзи қарор қилганини эълон қилган сўзлари ғалати эшитилади. Украина президентининг ҳаракат эркинлиги йўқлиги ва унинг Лондон ва Вашингтонга тўлиқ қарамлиги очиқ сирдир», — дея хулоса қилди Россия Хавфсизлик кенгаши котибининг биринчи ўринбосари.
