ОКМК: маҳаллийлаштириш дастури амалда
Олмалиқ кон-металлургия комбинатида маҳаллийлаштириш дастури асосида кенг кўламли ишлар амалга ошириб келинмоқда. Жумладан, биринчи чоракда дастур асосида 240 та лойиҳа бўйича 406,3 миллиард сўмлик маҳсулот ишлаб чиқарилди. Бу белгиланган режага (371,5 млрд сўм) нисбатан 109,4 фоизни ташкил этди. Ўтган йилнинг мос даврига нисбатан ўсиш суръати 4 баробар ошган. Импорт ўрнини босиш самарадорлиги 32,6 миллион долларга етган. Бунда янги лойиҳалар бўйича 314,1 миллиард сўмлик маҳаллийлаштирилган маҳсулотлар ишлаб чиқарилган.
2024 йилда маҳаллийлаштириш дастурига кўра, 268 та лойиҳа бўйича 1,5 триллион сўмлик маҳсулотлар ишлаб чиқариш белгиланган. Корхоналар кесимида оладиган бўлсак Марказий таъмирлаш-механика заводида 102 та лойиҳа бўйича 18,5 миллиард сўмлик, Илмий-ишлаб чиқариш бирлашмасида 31 та лойиҳа бўйича – 32,2 миллиард сўмлик маҳсулот ишлаб чиқарилган. Мис эритиш заводида эса 7 миллиард сўмлик, Портловчи материаллар заводида 52,7 миллиард сўмлик маҳсулот тайёрланган. Шунингдек, 8 та механик-таъмирлаш участкаларида 7,7 миллиард сўмлик, 3-МБФ қурилишида ишлатилаётган металл конструкциялари бўйича 196 миллиард сўмлик маҳсулотлар ишлаб чиқарилишига эришилган. Яна бир аҳамиятли жиҳати ўтган 3 ойда 1,2 миллион долларлик маҳаллийлаштирилган маҳсулотлар — палладий ва техник рух сульфати экспорти амалга оширилган. Саноат кооперацияси ва “шатакка олиш” тизими орқали биринчи чоракда маҳаллий ишлаб чиқарувчи корхоналардан 166,9 миллиард сўмлик маҳсулотлар харид қилиниб, прогноз 132 фоизга бажарилган (126,5 млрд сўм). Жумладан, Олмалиқ қуюв механика заводида 40 турдан ортиқ (300 млрд сўм) қуйма маҳсулотларни ишлаб чиқариш бошланди.
Жорий йилнинг 2-чораги ва 1-ярим йиллигида ҳам ушбу ишлар бардавомлик касб этади. Хусусан, апрель-июнь ойларида 416,9 миллиард сўмлик биринчи ярим йилликда 788,5 миллиард сўмлик маҳаллийлаштирилган маҳсулот ишлаб чиқарилади. Шундан 424,6 миллиард сўми ёки жами прогнознинг 53 фоизи 3-мис бойитиш фабрикаси металл конструкцияларига тўғри келади.
Умумий қиймати 674,8 миллиард сўм бўлган 150 та янги маҳсулотларни ишлаб чиқариш ўзлаштирилади. Натижада импортни қисқартириш самарадорлиги 62,1 миллион долларни ташкил этади.
“Интерcон Рооллерс” қўшма корхонасида конвейер роликларини ишлаб чиқариш июнь ойида ишга туширилиб, ойига 15 минг дона ролик ишлаб чиқарилади ва ушбу маҳсулотни импорт қилиш тўхтатилади. “Авантеc” қўшма корхонасида германиялик ҳамкорлар билан дастгоҳлар ишлаб чиқариш лойиҳаси доирасида қурилиш ишлари якунланди. Бугунги кунда ускуналарни олиб келиш ва ўрнатиш ишлари олиб борилмоқда.
