«Мен қудратли Аллоҳдан миннатдорман»: Покистоннинг илк Олимпиада чемпиони қаҳрамонларча кутиб олинди

Найза улоқтириш бўйича олтин медаль соҳиби Аршад Надим Покистонга енгил атлетика бўйича илк Олимпиада медалини олиб келди.

Лаҳор шаҳрида Надимни оиласи, жумладан, отаси бўйнига гулчамбар осиб, «Яшасин Аршад Надим! Яшасин Покистон!», дея ҳайқириб кутиб олди.

27 ёшли, икки фарзанднинг отаси Парижда эркаклар ўртасида найза улоқтириш бўйича қўшни ашаддий рақиб ҳиндистонлик амалдаги чемпион Неэраж Чопрани мағлуб этди. У 92,97 метрга найза улоқтириб Олимпиада рекордини ўрнатди.

«Надим Панжобнинг қашшоқ бурчагида ғиштдан қурилган уйда туғилиб ўсган. Ёшлигида буғдой далаларида қўлбола найзалар билан машқ қилган», дейилади Реутерс хабарида.

Президент Асиф Али Зардорий Аршад Надимга эришган муваффақияти учун Покистоннинг иккинчи олий фуқаролик мукофоти - Ҳилол-и-Имтиаз берилишини эълон қилди.

«Мен қудратли Аллоҳдан миннатдорман. Ота-онам ва Покистон халқига раҳмат айтаман», деди Надим йиғилганларга. «Бунинг ортида менинг ва мураббийим Салмон Баттнинг катта меҳнати бор».