Машарипов Туркия клубига ўтишга яқин

Ўзбекистон ярим ҳимоячи Жалолиддин Машарипов фаолиятини Туркиянинг «Самсунспор» клубида давом эттириши мумкин. Туркия Суперлигаси вакили трансфернинг сўнгги кунида 30 ёшли футболчи билан шартнома имзолашга ҳаракат қилмоқда.

Эслатиб ўтамиз, Туркия футбол федерацияси қабул қилган қоидага кўра, Суперлиганинг ҳар бир жамоаси ўз сафига бир нафар Ўзбекитон, Озарбойжон, Қозоғистон, Қирғизистон ёки Тожикистон фуқаросини легионерлар лимитидан ташқари қабул қилиши мумкин.

Машариповнинг сўнгги клуби Саудия Арабистонининг "Ан-Наср" клуби бўлганди. Томонлар яқинда ўзаро келишув асосида амалдаги шартномани бекор қилди. Ҳозирда Жалолиддин эркин агент мақомига эга.

«Самсунспор» жорий мавсумда 3 ўйиндан кейин 1 очко билан 18-поғонани эгаллаб турибди.