“Кубогинггаям! “Реал”инггаям! Айниқса, анави Пересингга!” Зидандан “Зиданча” истеъфо!
Айни дамда Зинедин Зиданнинг “Реал”дан кетгани асосий баҳс-мунозараларга сабаб бўлмоқда. Боиси, гарчи олдинроқ франциялик мутахассиснинг омадсиз мавсум туфайли жамоадан кетиши ҳақида гап-сўзлар юрган бўлса-да, “Реал” ЕЧЛ бош совринини кетма-кет уч марта қўлга киритиб, ўз рекордини янгилагандан кейин кўпчилик Зиданнинг қолишига ишонганди. Ҳатто хориж нашрларида ҳам франциялик мутахассиснинг кетиши ҳақидаги фикрлар тинчиб қолганди. Бироқ худди шу паллада Зидан кетишини эълон қилиб қўя қолди. Хўш, бунинг сабаблари нимада?
БИРИНЧИ САБАБ — ПЕРЕС
Албатта, бизнингча, Зидан “қироллик клуби”дан кетишни истамаган. Бу ерда Флорентино Переснинг ҳам ҳиссаси бор. Чунки Зидан фарзандларини эндигина катта футбол билан таништира бошлаганди, хусусан, Лука Зидан ЕЧЛ финали қайдномасига киритилди. Зидан ўғилларининг яхши футболчи бўлиб етишишига ёрдам беришни истагани бор гап. Бундай вазиятда у жамоадан кетишни истамасди. Бироқ сўнгги пайтлардаги можаролар, трансфер борасидаги келишмовчиликлар Перес ва Зиданнинг муносабатларини совитгани бор гап. Гарчи журналистлар, жамоатчилик кўз ўнгида бу икки инсон юқоридаги омилларни рад этишса-да, аммо Зидан ва Перес ўртасида келишмовчилик юзага келгани ҳақиқатга яқинроқ. Шу боис Зидан бу курашда Пересдан устун кела олмаслигини тушуниб етган ва тинчгина истеъфога чиққан.
ИККИНЧИ САБАБ — МАЖБУРИЙ ИСТЕЪФОНИНГ ОЛДИНИ ОЛИШ
Зидан истеъфога чиққанини қуйидагича изоҳлади: “Реал” кейинги мавсумда мен билан қийналиши мумкин”. Албатта, бу очиқ-ойдин ҳақиқат эканлиги кўриниб турганди. Зиданнинг “Реал”и Ла Лигада “Барселона”га ошкора ютқазди. Чемпионлар лигасида эса қийинчилик билан зафар қучди. Бундай омад эса ҳар доим ҳам кулиб боқавермайди. Агар яна бир мавсум жамоада қолганида, эҳтимол, “Реал”нинг натижалари янада сусаяр ва Зидан мажбурий тарзда истеъфога чиқарди. Франциялик мутахассис Моуриньо, Марадона, Луи ван Гал ва шунга ўхшаш бошқа мураббийлар каби шармандали тарзда жамоадан ҳайдалгандан кўра Сер Алекс Фергюсонга ўхшаб ўз вақтида обрўси борида клубдан кетишни афзал билди.
Зиданнинг ор-номуси кучли. У нафсониятини, қадр-қимматини ҳар нарсадан устун қўяди. Буни ўша машҳур финалда кўрганмиз. Франция — Италия баҳси ва Зиданнинг калла қўйиши. Ўшанда айнан ор-номуси туфайли Зидан ўзини бошқара олмаган ва ҳакам томонидан қизил карточка олиб майдан четлатилганди. Бу сафар ҳам шунга ўхшаш ҳолат юзага келишини истамагандир, балки. Эҳтимол, Перес ҳам унинг нафсонияти тегиб қўйса, Зидан Пересни ҳам аямаслиги аниқ-ку (ҳазил). Нима бўлганда ҳам, мухлислар Зиданни шу пайтгача афсонавий футболчи сифатида эслашарди. Энди унга афсонавий мураббий хотираси ҳам қўшилди.
Зиданнинг кетишига биз таъкидлаб ўтмаган бошқа омиллар ҳам сабаб бўлгандир. Биз унга келажакда омад тилаб қоламиз.
