Ислом Каримов билан 1996 йилда суратга тушган таниқли президент вафот этди (ФОТО)

Франциянинг собиқ президенти Жак Ширак 86 ёшида вафот этди, дея хабар бермоқда Агенcе Франcе-Прессе унинг оиласига асосланиб. Бу ҳақда "Дарё" ёзмоқда.

Жак Ширак Ўзбекистон Биринчи Президенти Ислом Каримов билан, 1996 йил, апрель.

«Бугун тонгда яқинлари қуршовида ҳаётдан кетди. Тинч ором олсин», — дея Ширакнинг куёви Фредерик Сала-Барунинг сўзларини келтирмоқда агентлик.

Жак Ширак 1995 йилдан 2007 йилгача Франция президенти бўлган. Ундан олдинроқ икки марта — 1974-1976 йилларда ва 1986-1988 йилларда мамлакат бош вазири бўлган. Бош вазирлигининг иккинчи муддатида Ширак бир вақтнинг ўзида Париж мэри лавозимида бўлган. У Франция пойтахтини 18 йил давомида бошқарган.

Ширак Франция Иккинчи жаҳон уруши вақтида яҳудийлар депортациясига алоқадор бўлганини тан олган, шунингдек, АҚШ Ироққа бостириб киришига қаршилик қилган. Бундан ташқари, Ширак бошқаруви даврида Франция президенти ваколати муддати 7 йилдан 5 йилга туширилганди.

Жак Ширак 1995 йилдан 2007 йилга қадар икки муддат Франция президенти бўлган. Бунгача мамлакат бош вазири ва 18 йил давомида Париж шаҳри мери сифатида фаолият олиб борган.