Hyundai, Kia, Toyota компаниялари учун Ўзбекистон тайёр чарм етказиб беради
“Ўзчармсаноат” уюшмаси делегациясининг Жанубий Кореяга амалга оширган ташрифи давомида мазкур мамлакатнинг автомобилсозлик корхоналари учун чарм маҳсулотларини етказиб берувчи “ЖМ” компанияси билан учрашув бўлиб ўтди.
Мулоқотда мамлакатимизда ишлаб чиқарилаётган чарм маҳсулотлар сифати, хомашё базаси, корхоналарда қўлланилаётган замонавий технологиялар, инвест муҳит тўғрисида Корея компаниясига батафсил маълумот берилди.
“JM” компанияси Жанубий Кореядаги энг йирик чарм ишлаб чиқарувчи корхона саналади. Бу ерда тайёрланаётган чарм маҳсулотлар асосан Hyundai, Kia, Toyota компанияларининг автомобилларига етказиб берилади. Компаниянинг йиллик даромади 250 миллион долларни ташкил этади. 1 миллиард доллар эвазига барпо этилган ишлаб чиқариш корхонаси тўлиқ Италия ва Германия технологиялари билан жихозланган.
Мулоқотда компания Ўзбекистонда сўнги йилларда чармсаноат соҳасидаги ўзгаришлар ва янгиланишлардан ҳабардор эканлиги, шу сабаб чармнинг иккиламчи ва тайёр холдаги кўринишини айнан мамлакатимиздан харид қилишни режалаштираётганини маълум қилди.
Шунингдек, “Ўзчармсаноат” уюшмаси делегацияси ишлаб чиқариш жараёнлари, маҳсулотлар сифати билан яқиндан танишди. Шу ернинг ўзида “JM” компанияси вакилларига республикамизнинг 16 та ҳудудида ташкил этилган KSZлари ва уларда чармсаноат соҳасига йўналтирилган лойиҳаларни амалга ошириш бўйича бизнес таклифлар тақдим этилди.
Компания Тошкент вилоятида қўшма корхона очиш ва у ерда ишлаб чиқариладиган чармни Жанубий Корея бозорига ва автомобилсизлик соҳасидаги йирик компанияларга етказиб бериш бўйича ўз ташаббусларини билдирди.
Компания делегацияси апрель ойида Тошкентга ташриф буюриб чарм ишлаб чиқарувчи маҳаллий корхоналар билан музокарлар ўтказишга ва амалга ошириладиган лойиҳаларни муҳокама қилилб олишга тайёр эканлигини маълум қилди.
Шундай қилиб, Ўзбекистонда тайёрланаётган чарм маҳсулотлар келгусида Жанубий Кореянинг йирик автомобиль заводларида ишлаб чиқарилаётган автоуловларда қўлланила бошланади.
