"Фотошоп": Бухорода аёлнинг фотосуратларига қайта ишлов бериб, тарқатмоқчи бўлган кибертовламачи қўлга олинди
Аёлнинг фотосуратларига махсус дастур ёрдамида қайта ишлов бериб, тарқатиш билан қўрқитиб, пул талаб қилган кибертовламачи қўлга олинди
————
Бухоро вилояти, Когон туманида яшовчи 35 ёшли (аёл) К.З. ариза билан мурожаат қилиб, “Телеграм” мессенжерида “!!!??” номли профиль эгаси, К.З.нинг турли фото-суратлари ва беҳаё тасвирларини интернет ижтимоий тармоғи орқали тарқатиб юбориш билан қўрқитиб, тарқатмаслик эвазига пул талаб қилаётганлигини маълум қилган.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, мазкур жиноятни Бухоро вилояти, Когон туманида яшовчи 19 ёшли талаба Т.Б. содир этганлиги аниқланган.
Гумонланувчи сифатида тергов органларига жалб этилган Т.Б., К.З. билан “Telegram” мессенжерида “!!!??” профили орқали ёзиб, мўмайгина пул ишлаш мақсадида К.З.нинг профилидаги фотосуратларига махсус дастур ёрдамида қайта ишлов бериб, яланғоч ҳолдаги беҳаё фотосуратлари борлигини айтиб, ушбу беҳаё фотосуратларини ижтимоий тармоқларга тарқатиб, шарманда қилиш билан уни қўрқитиб, фотосуратларни ижтимоий тармоқларга тарқатиб юбормаслик эвазига ундан 200 АҚШ доллари миқдорида пул талаб қилиб, “ххх” номли автомобильларга ёқилғи қуйиш шаҳобчаси яқинидаги бекат олдида, тезкор тадбир давомида пул талаб қилган Т.Б.га тақдим қилиш учун берилган 2.500.000 сўм пулларни К.З.дан олган вақтида, далилий ашёлар билан ушланди.
Мазкур ҳолат юзасидан Ўзбекистон Республикаси ЖКнинг 165-моддаси 1-қисми билан жиноят иши қўзғатилиб, Т.Б.нинг содир этилиб фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда.
🟥Қонунга мувофиқ, Ўзбекистон Республикаси Жиноят кодексининг 165-моддаси 1-қисмидаги жиноий хатти-ҳаракатлар учун 3 йилдан 5 йилгача озодликдан маҳрум қилиш жазоси назарда тутилган.
