Чирчиқда янги боғ — замонавий кўнгилочар ва дам олиш маскани ташкил этилди

Чирчиқда, бир вақтлар қаровсиз қолган хиёбон ўрнида, шаҳарнинг янги диққатга сазовор маскани –замонавий истироҳат боғи очилди. Боғ аҳолининг дам олиши, вақтни мароқли ўтказиши ва табиат билан уйғунликда ҳордиқ чиқариши учун қулай маскандир. PepsiCo компаниясининг Марказий Осиёдаги етакчи боттлери ҳисобанган International Beverages Tashkent компанияси ушбу йирик лойиҳани амалга оширишга 30 миллиард сўмдан ортиқ маблағ ажратди. 2024 йил августда бошланган фаол ободонлаштириш ишлари 2025 йил апрелда муваффақиятли якунланди. Боғнинг умумий майдони қарийб 68 гектарни ташкил этиб, шундан 33 гектари ўзлаштирилган.
ТАШЛАНДИҚ ҲУДУДНИНГ ЯШИЛ МАКОНГА АЙЛАНИШИ

Кўп йиллар давомида бу майдон ташландиқ ҳолда қолиб, шаҳарликлар томонидан норозиликларга учраган эди. Бугун эса бу ерда барпо этилган замонавий боғ шаҳар аҳолиси ва меҳмонлари учун ҳақиқий туҳфа бўлди. Кўпчиликни фикрига кўра, бу замонавий яшил маскан Чирчиқнинг ташриф қоғозига айланиши мумкин.

Лойиҳанинг ташаббускори ва ҳомийси International Beverages Tashkent компанияси нафақат ҳудудни ободонлаштириш, балки дам олиш, спорт ва оилавий ҳордиқ чиқариш учун ҳар томонлама қулай муҳит яратишдек улкан мақсадни ўз олдига қўйган.

Алоҳида эътибор кўкаламзорлаштиришга қаратилган: боғда 3000 дан ортиқ дарахт экилди, улар орасида қайин, тол, қарағай, шумтол, заранг, эман ва жўка дарахтлари бор. Шунингдек, туя ва арча каби игнабаргли дарахтлар ҳам экилиб, 5 гектардан ортиқ майдо Америка бедапояси билан қопланди. Табиат қўйнида оилавий пикниклар уюштиришга ушбу ҳудуд жуда тўғри келади. Ўсимликларни парваришлаш учун 10 гектардан зиёд майдонда замонавий суғориш тизими жорий этилди.

БОҒ ИНФРАТУЗИЛМАСИ: БАРЧА ШАРОИТ АҲОЛИ УЧУН

Боғ лойиҳаси барча ёш гуруҳларининг қизиқишларини инобатга олган ҳолда ишлаб чиқилган. Фаол турмуш тарзи ихлосмандлари учун замонавий машқ майдончалари, арқонли шаҳарча, сунъий қоя ва Zip Coaster экстремал аттракциони яратилган. Экстремал спорт ишқибозлари учун эса махсус скейтборд майдонлари қурилган. Скейтбординг мухлислари фикрича, майдон барча замонавий сифат ва спорт меъморчилиги талабларига тўлиқ жавоб беради.

Боғнинг энг эътиборга сазовор жойи сифатида кўл танланиб, унинг майдони 2 гектардан 3,4 гектаргача кенгайтирилган. Сув ҳавзасининг лойқаланишини олдини олиш мақсадида унинг тубига махсус қоплама ётқизилган. Кўлнинг қирғоқлари бўйлаб қулай югуриш йўлакчаси барпо этилган. Сувда оққушлар ва ўрдаклар сузиб юргани, кўлга янада гўзаллик ва сокинлик бағишлаб туради. Сувнинг мувозанатни сақлаш учун ҳимоя тўғони қурилиб, икки қирғоқни боғлаб турадиган кўприк пиёдаларнинг сайр қилишига янги мазмун киритиши шубҳасиз.

Боғ инфратузилмасининг яна бир муҳим қисми кўлнинг гўзал манзарасига қараб турган амфитеатр ҳисобланади. Бундан кейин ташкил қилинадиган кўплаб маданий тадбирлар, концертлар ва фестиваллар айнан шу ерда ўтказилиши кутилмоқда.

ХАВФСИЗЛИК ВА ҚУЛАЙЛИК

Боғнинг қайта тикланишида ташаббус кўрсатганлар аввало масканни қурилишида хавфсизлик масалаларига алоҳида эътибор қаратишди. Ҳудуд видеокузатув тизими, ёритиш мосламалари, қулай пиёдалар йўлаклари ва автомобиль тўхташ жойлари билан жиҳозланган. Имконияти чекланган шахслар учун ҳам барча қулайликлар мавжуд бўлиб, боғнинг лойиҳасига кўра ҳар бир меҳмон ҳудуд бўйлаб хавфсиз ҳаракатланиши ва мароқли вақт ўтказиши учун ушбу масканда энг замонавий шароитлар яратилган.

Бугунги кунда Чирчиқдаги янги боғ шунчаки ободонлаштирилган ҳудуд эмас, балки шаҳарликлар ва сайёҳлар учун дам олиш, мулоқот қилиш ва фаол вақт ўтказиш учун янги имкониятлар тақдим этадиган замонавий диққатга сазовор гўшадир.