Дмитрий Песков шифохонадан чиқди, аммо ҳали карантинда

Дмитрий Песков шифохонадан чиқди, аммо ҳали карантинда

Россия президенти матбуот котиби Дмитрий Песков коронавирусдан даволангач шифохонадан чиқарилди. Ҳозирда у карантинда қолмоқда. Бу ҳақда унинг рафиқаси Татьяна Навка маълум қилди. Песков билан бирга унинг рафиқаси ҳам коронавирусга чалинган эди.

“Барчаси яхши. Катта раҳмат, биз шифохонадан чиқдик ва ўзимизни яхши қилмоқдамиз. Яна бир ҳафтача карантинда бўламиз”, деб айтган Навка Daily Storm нашрига.

Песковнинг ўзи ҳам бу маълумотни тасдиқлаган. У ҳозирча уйидан ишлаб туришини таъкидлаб ўтган.

Россия президенти матбуот котиби ўзида коронавирус аниқланганини 12 май куни маълум қилган. 

Песков кейинроқ “Коммерсант” нашрига берган интервьюсида унда касалликнинг илк аломатлари ҳамкасбларидан бири коронавирусга чалингани сабабли ўзини изоляциялаганидан кейин пайдо бўлганини маълум қилган. Песков уйда 2-3 кун ўтказгач, ўпкасини компьютер томографияси қилдирган. Томография унда икки томонлама зотилжам кетаётганини кўрсатган. Шундан кейин у рафиқаси билан бирга шифохонага ётқизилган. Навка ўтган ҳафта шифохонадан даволаниб чиққан.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!