Asal Honey’ни ўлдирган қотил ушланди. У нега бу ишга қўл урганини айтди

Жорий йилнинг 18 март куни Тошкент шаҳрининг Яшнобод туманидаги кўп қаватли уйлардан бирида хоразмлик инста-блогер Asal Honey ўлдириб кетилди. Унинг мурдаси қотиллик аломатлари билан топилган.

Бугун, 21 март куни Asal Honey номи билан танилган Асал Хўжаевани ўлдирганликда гумонланган шахс Хоразм вилоятининг Янгиариқ туманидан ушланган. Маълум бўлишича, ушбу жиноятни 09.12.1997 йилда Хоразм вилояти Янгиариқ туманида туғилган, миллати ўзбек, маьлумоти ўрта – махсус, Янгиариқ тумани Каттабоғ қишлоғи рақамсиз уйда яшовчи Ш.К содир этган.

Янгиариқ тумани ИИБ хамда Тошкент шахар ИИБ ЖҚБ ходимлари билан хамкорликда фуқаро Ш.К қидириб топиш мақсадида ўтказилган тезкор қидирув тадбирлари давомида у Янгиариқ тумани Каттабоғ қишлоғида яшаш уйининг олдида ушланган.

Қотилликда гумонланаётган йигит Асал Хўжаева билан бундан тахминан 1 йилча олдин телеграм орқали танишган, бу орада у 2021 йилнинг ноябрь ойларида А.Х билан бир марта кўришган.

Ш.К Асал Хўжаевадан жинсий алоқа қилишини сўрайди, А.Х эса унга пули йўқлигини айтиб кетиб қолган. Шундан сўнг, у Асал Хўжаева билан телеграмда муносабатини давом эттирган.

Суриштирув ишлари давомида йигит тахминан 20 кун олдин Асал Хўжаева билан урушиб қолганлиги, А.Х уни қаттиқ ҳақорат қилгани ва гумонланувчи А.Хни кузатишни бошлаганини айтган. Бундан ташқари, у Instagram орқали А.Хўжаеванинг яшаш манзилини аниқлаб, икки маротаба унинг яшаш уйига кузатиб келган.

16 март куни эса А.Хни ўлдириш мақсадида Чирчиқ шаҳридаги “Карвон” бозоридан бир дона ошхона пичоқи ва қўлига кийиш учун бир жуфт қўлқоп сотиб олиб, соат тахминан 19:00 лар атрофида А.Хнинг яшаш уйининг олдига борган. А.Х уй эшигини очиб ташқарига чиқишини кутиб, тахминан 2 соат кутган. Соат тахминан 21:00лар атрофида А.Х уй эшигини очган пайти қўлидаги ошхона пичоқи билан унинг қорин қисмига пичоқ тиқиб, овози чиқмаслиги учун қўли билан оғзини ёпиб, уриб, йиқитиб, оғзига ёстиқ босиб қасддан ўлдирган.

Шундан сўнг А.Хнинг яшаш уйидан жами 500 АҚШ доллари ҳамда 200 минг сўм пуллари, шунингдек, пластик картадан 1 млн сўм пулларни Line Bet ўйинига ўтказган. Бундан ташқари, марҳума А.Хга тегишли бўлган 2 та телефонни олиб, йўл-йўлакай отиб юборган. Кейинчалик эса, 19 март куни Янгиариқ туманидаги ота-онаси яшайдиган уйга етиб келган. Суриштирув ҳаракатлари давомида гумонланувчининг уйидан жами 10 млн сўм пул, ҳайдовчилик гувоҳномаси, ўз номида бўлган 2 та пластик карталар, бир дона эркаклар сумкаси, бир дона ID карталар далилий ашё сифатида ҳужжатлаштириб олинган.

Маълумот ўрнида, мазкур ҳолат юзасидан Суд-тиббий экспертизасининг дастлабки маълумотига кўра, А.Хўжаеванинг ўлими қорин олд соҳасида бир дона санчилиб кирувчи кесилган жароҳати, бўйин чап томони санчиб кесилган жароҳати, бош мия ёпиқ жароҳати, бош мия юмшоқ тўқималарига қон қуйилиши оқибатида юз берганлиги аниқланган.

Воқеа жойи криминалистика техника воситалари ёрдамида кўздан кечирилиб, қонга ўхшаш доғлардан намуналар, мурда кийимлари, қўл бармоқ излари, 1 дона Apple ноутбук, 1 дона Integral 4G хотира картаси, 1 дона Huawei, 1 дона Samsung ва 2 дона MI телефон аппаратлари, 4 дона банк пластик карталари далилий ашё сифатида олинган.

Воқеа жойига Тошкент прокурори биринчи ўринбосари И.Наримов, шаҳар ИИББ бошлиғи биринчи ўринбосари У.Турсунов, Яшнобод туман прокурори А.Донаев, шаҳар ИИББ ва туман ИИО ФМБ раҳбарияти ҳамда тезкор тергов гуруҳи аъзолари чиқишган. Табиийки, мазкур шахслар қотиллик бўйича тергов-суриштирув ишларини охиригача олиб боришга маъсул шахслардирлар.

Ҳолат юзасидан Бош прокуратура берган маълумотда Тошкент шаҳар прокуратураси томонидан Жиноят кодексининг 97-моддаси (Қасддан одам ўлдириш) билан жиноят иши қўзғатилиб, жиноятни фош этишга қаратилган тезкор-тергов ҳаракатлари олиб борилаётгани, натижалари ҳақида қўшимча хабар қилиниши айтилган.

Маълумот учун, А.Хўжаева 1986 йилнинг 10 окятбрида Хоразм вилоятида туғилган, турмушга чиқмаган. Яшнобод тумани, Махтумқули кўчаси, 99-уй, 210-хонадонда яшаган.