Андижонда рекорд миқдорда алимент тўланди
Хизмат сафари билан хорижга чиқиши учун 4 нафар фарзанди бор ота 547 млн. сўм миқдорида алимент тўлашига тўғри келди.
Маълум бўлишича, фуқаролик ишлари бўйича Андижон туманлараро судининг ижро ҳужжатига асосан қарздор М.Ш. ундирувчи М.Ш. фойдасига 4 нафар фарзанди таъминоти учун алимент тўлаб бориши белгиланган.
Ижро ҳаракатлари давомида алимент пуллари ҳар ойда ундириб келинган.
Қарздор М.Ш. айни кунларда чет элга хизмат сафарига чиқиш зарурати бўлаётгани сабабли алимент пулларини олдиндан тўлашини билдирди.
Мажбурий ижро бюроси Андижон туман бўлими давлат ижрочиси томонидан қонунчиликда белгиланган тартибга кўра, қарздорнинг ойлик иш ҳақи даромадлари ҳисобидан 5 йиллик алимент пуллари ҳисоб-китоб қилиб берилди.
Шундан сўнг, суднинг ажримига биноан 4 нафар фарзанднинг алименти учун 2029 йил 30 июнга қадар ҳисобланган 547 млн. сўмни олдиндан тўлаш шаклида ижро этиш усули ўзгартирилди.
Қарздор М.Ш. 547 млн. сўм алимент пулларини тўлиқ тўлади ва қарздорга нисбатан қўйилган чекловлар бекор қилинди.
