Навоийда эркак қизи ва қайнонасининг кўз ўнгида хотинини ўлдиришга уринди

Жиноят ишлари бўйича Навоий вилояти Хатирчи туман суди биносида ўтказилган очиқ суд мажлисида турмуш ўртоғини ўлдиришга суиқасд қилган шахсга нисбатан жиноят иши кўриб чиқилди. Бу ҳақда Жиноят ишлари бўйича Хатирчи туман суди судьяси Ҳабилулла Тухтаев "Aniq.uz"га маълум қилди.

1964 йилда туғилган Ҳ.Собиров (шахси ўзгартирилган) 2021 йил 18 июнь куни соат 22ларда Хатирчи тумани, “Авоқли” маҳалла фуқаролар йиғини, “Ширрак” қишлоғидаги рақамсиз яшаш уйининг ҳовлисида турмуш ўртоғи Қ.Юлдошева (шахси ўзгартирилган) унинг вафот этган биринчи турмуш ўртоғи Б.Ҳасановадан бўлган фарзандларига ғамхўрлик кўрсатганлигига норозилик билдиргани сабабли келиб чиққан жанжал давомида унинг шаъни ва қадр-қимматини камситувчи уятли сўзлар билан ҳақорат қилгани натижасида юзага келган қасд замирида, Қ.Юлдошевани қасддан ўлдириш мақсадида хонадон ҳовлисидаги гўшт тахтаси устида турган ошхона чопқисини қўлга олиб, вояга етмаган қизи С.Суннатова ва қайнонаси Ш.Қўлдашеваларнинг кўз ўнгида, уларга кучли руҳий изтироб бераётганлигини англаган ҳолда, ошхона чопқиси билан Қ.Юлдошеванинг ҳаёти учун муҳим аъзоси ҳисобланган бош тепа, энса ва ёноқ соҳаларига беш марта ҳамда ўнг тирсак бўғин соҳасига икки марта уриб, унга ўта шавқатсизлик билан ҳаёти учун хавфли бўлган оғир тан жароҳатлари етказиб, ўта шавқатсизлик билан қасддан одам ўлдиришга суиқасд қилган.

Шундан кейин, Ҳ.Собиров жиноятнинг гувоҳи бўлган вояга етмаган қизи С.Суннатованинг руҳий ҳаяжонланиш ҳолатида онаси Қ.Юлдошева ўлганлиги ҳақидаги сўзларини эшитиб, Қ.Юлдошевани қасддан ўлдиришдан иборат жиноий мақсадига эришганлигига ишонч ҳосил қилгач, қўлидаги жиноят қуроли ҳисобланган ошхона чопқисини ҳовлидаги чуқур хандакка ташлаб юбориб, ходиса содир бўлган жойдан яширинган.

Қ.Юлдошева ўз вақтида Хатирчи туман тиббиёт бирлашмасига олиб борилиб, кўрсатилган тиббий ёрдам натижасида, унинг ҳаёти сақлаб қолинган.

Республика суд тиббий экспертизаси илмий-амалий маркази Навоий вилоят филиалининг 24.07.2021 йилдаги 797-сонли хулосасида жабрланувчи Қ.Юлдошеванинг танасида бош мия ёпиқ жароҳати, бош мия лат ейиши, бош чап чакка, ўнг чакка тепа суяклари, ўнг ёноқ суяклари синиб силжиши, бош чап чакка, ўнг тепа, ўнг ёноқ ва ўнг тирсак бўғими чопилган яраси каби ҳаёт учун хавфли бўлган оғир тан жароҳатлари аниқланиб, ушбу жароҳатлар ўткир чопувчи жисмдан етказилганлиги кўрсатилган.

Суд, Ҳ.Собировни содир этган жиноятининг хусусияти ва ижтимоий хавфлилик даражасини, муқаддам судланмаганлигини, айбига иқрорлиги, қилмишидан чин кўнгилдан пушаймонлигини, муқаддам судланмаганлигини, жабрланувчининг даъвоси йўқлигини, ёшини, жабрланувчи бир оила эканлигини, содир этган жиноятни ижтимоий хавфлилик даражасини, оилавий шароити инобатга олиб, Ўзбекистон Республикаси Жиноят кодекси 25,97-моддаси 2-қисми “ж” банди билан шу Кодекснинг 57-моддасини қўллаб, 10 (ўн) йилга озодликдан маҳрум қилиш жазоси тайинланди.