Зеленский Украинадан аҳолининг рекорд даражада чиқиб кетишини тан олди
Украина президенти Владимир Зеленский Ташқи ишлар вазирлиги ходимлари олдидаги нутқида мамлакат аҳолисининг рекорд даражада чиқиб кетишига дуч келаётганини тан олди. Унинг нутқи расмий Телеграм каналида эълон қилинди.
Зеленскийнинг сўзларига кўра, гап миллионлаб украиналиклар ҳақида кетмоқда – Украинанинг хорижда ҳеч қачон бундай миқдордаги фуқаролари бўлмаган.
У, шунингдек, мамлакатдан ташқарида украиналикларнинг манфаатларини ҳимоя қиладиган янги институт ташкил этилишини маълум қилди. Ушбу бўлим Ташқи ишлар вазирлигининг айрим функцияларини ўз зиммасига олади. Президент хорижга саёҳат қилаётган украиналиклар Россия ташвиқоти таъсирида бўлиб, ўз ватанлари билан маданий алоқаларини йўқотаётганини таъкидлади.
«Миллионлаб фуқароларимиз бошқа мамлакатларда. Уларнинг Украина билан алоқалари ва халқ сифатида бизнинг манфаатларимизни ҳимоя қилиш янги институтнинг вазифаси бўлади», — деди Зеленский.
