Самарқандда 28 кунлик келин-куёв заҳарланиб вафот этди
Жорий йил 18 январь куни Самарқанд вилояти Каттақўрғон туманида келин-куёв ис газидан вафот этди. Бу ҳақда «Эзгулик» жамияти раиси Абдураҳмон Ташанов ўзининг Facebook'даги саҳифасида ёзиб қолдирди.
«Бугун Самарқанд вилояти Каттақўрғон тумани Олтинсой қишлоғида 28 кунлик келин-куёв тупроққа қўйилди. Маълум бўлишича, тун ярмида газ тармоқдан узилган ва қайта ёқилган. Олов ўчгач, сизган газ туфайли уйқудаги келин-куёв заҳарланган. Улар эрталаб хонадонида ўлик ҳолда топилишди.
Туман газ идораси аза бошланмасидан хонадон эгаларини техника хавфсизлигига риоя қилмасликда айблаб, далолатнома тўлдириб кетишди. Ўлганлар даъво қилолмайди: ҳеч ким газни нега бемаҳал уздинг, нега огоҳлантиришсиз ёқдинг, деёлмайди.
Шоҳрўз Аъзамов янги йил арафасида уйланганди. Кўпчилик қатори бир олам орзулари бор эди, эссиз… Оила фожиаси - миллат фожиаси, дейдилар. Ўша куни қишлоққа ҳоким келган экан. Газчилар бу валломатга яхши кўриниш учун газни баландлатиб, масхарабозлик қилишган», — деб ёзади Ташанов.
Бош прокуратура матбуот котиби Ҳаёт Шамсутдиновнинг маълум қилишича, воқеа 4 кун олдин содир бўлган, келин-куёвнинг яқинлари жасадни кўмиб юборган ва бу тўғрисида ҳуқуқни муҳофаза қилиш органларига хабар бермаган.
