Наҳотки?! Рим папаси бир жинсли никоҳни оқлаб чиқди

Рим папаси Франциск ҳамжинсбозларнинг турмуш қуришини маъқуллади, дея хабар беради Deutsche Welle. 

“Гомосексуалларнинг ҳам оила қуришга ҳақи бор. Улар Тангрининг болалари ва оила қуриш ҳуқуқига эга. Ҳеч ким бунинг учун таҳқирланиши ёки азоб чекиши керак эмас”, – деди у “Франциск” деб номланган ҳужжатли фильмда.

Мазкур фильмнинг премьераси 21 октябрь куни Рим кинофестивалида бўлиб ўтди, уни америкалик режиссёр, асли россиялик Евгений Афинеевский суратга олган. 

“Франциск” фильмида Андреа Рубера исмли ҳамжинсбоз ҳақида ҳикоя қилинган. У ўзига ўхшаган шериги билан уч болани асраб олган, болаларни католик қилиб тарбиялаш нияти борлиги ҳақида Рим папасига мактуб ёзган. Папа эса унинг ишини маъқуллаган. 

Папанинг фикрича, ҳамжинсбозлар ҳам турмуш қуриши керак, ана шунда улар ҳуқуқий ҳимоя остида бўлади. Шундай қилиб, Франциск ҳамжинсбозларнинг турмуш қуришини ошкора қўллаб-қувватлаган биринчи папа бўлди. 

Франциск Буэнос-Айресда архиепископ бўлиб ишлаб юрган пайтида ҳам ҳамжинсбозларни ҳимоя қилган эди.