Кореядан Тошкентга тиббий ускуналар ортилган махсус самолёт етиб келди
Сеулдан Тошкентга 26 апрель куни бортида умумий қиймати 1 миллион доллар бўлган тиббий ускунлар ортилган махсус самолёт етиб келди, деб хабар қилмоқда Ўзбекистоннинг Жанубий Кореядаги элчихонаси.
"Бугун, 26 апрель куни “Uzbekistan Airways” авиакомпаниясининг чартер рейси орқали умумий оғирлиги 6,2 тонна бўлган юқори технологик тиббий асбоб-ускуналар, автомат механизмли тиббий каравот ва ПЦР диагностика тест тизимларидан иборат юкнинг биринчи қисми мамлакатимизга олиб келинди, - дейилган хабарда.
Олиб келинган қимматли юк таркибига ҳамкор Жанубий Корея ҳукумати молиявий кўмагида харид қилинган 20 мингта тест тизими, шунингдек, мамлакат тадбиркорлари томонидан тақдим қилинган 50 та автоматик бошқариладиган кўп функцияли тиббий каравот, 4 мингта махсус тиббий ҳимоя кийими, 10 минг жуфт стерилланган қўлқоп, 18 минг 500 та тиббий ниқоб, 25 минг антисептик восита, 10 та кўп функцияли монитор киритилган.
Бундан ташқари, ультратовуш тадқиқоти (УТТ) учун зарур жиҳозлар, кардиомониторлар, шприцлар учун ишлатиладиган инфузион насослар, ҳавони тозалаш аппарати ҳам бор. Коронавирус инфекциясига чалинган беморларда кислород етишмовчилиги ҳолатлари кузатилади. Шу боис тақдим этилган тиббий жиҳозлар орасида қон таркибида кислород миқдорини ўлчайдиган пульсоксиметр мосламаси, дезинфекция учун сунъий буғ генератори, коронавирусни аниқлаш учун тезкор тест тизимлари ва рентген аппаратининг борлиги алоҳида аҳамиятга эга.
Инсонпарварлик ёрдами Жанубий Корея ҳукумати, Шинхан университети ва мамлакатнинг “Evergreen Motors”, “Shindong Resources”, “Hanshin E&C”, “Chung Hospital”, “Union Korea Pharm”, “BOMI E&C”, “GM Korea”, “UNICO Logostics”, “Century”, “Baraka Holding”, “Tashkent Trade Center”, “Hyundai Engineering” каби компаниялари, тиббий муассасалари, савдо марказлари ва юртимизда фаолият юритаётган фирмалари томонидан тақдим этилди.
Олиб келинган тиббий анжом ва воситалар мамлакатимизда карантин тадбирларини ташкил этиш, касалликларни аниқлаш ва даволаш, реабилитация тадбирларини амалга оширишда қўлланилади. Инсонпарварлик ёрдамининг қолган қисми навбатдаги юк чартер рейси билан мамлакатимизга олиб келинади, дейилган хабарда.
Эслатиб ўтамиз, ўтган ҳафтада аввал Ўзбекистоннинг Корея Республикасидаги туризм элчиси, машҳур «Сарой жавоҳири» телесериалидаги Тангем роли ижрочиси Ли Ёнг Э ўзи иштирокидаги янги – “Саимдан, ранг-баранг хотиралар” номли 3 миллион долларлик телесериални ўзбекистонлик кино шинавандаларига беминнат ҳадя қилган эди.
