Исроил ўз фуқаросини қайтариб олиш учун Сурияга вакцина бердими?
Guardian газетасининг ёзишича, Исроил асир тушган фуқаросини қайтариб олиш учун Сурияга коронавирусга қарши вакцина берган.
Ўтган ҳафтада Россиянинг воситачилигида Исроил фуқароси бўлган аёл Суриядан ватанига қайтарилди. Исроиллик журналист Барак Равид "Твиттер"даги саҳифасида бунинг учун Исроил томони Россияга 1,2 миллион доллар берганини, бу пулга Сурия учун Sputnik V вакцинаси олинганини ёзди. Суриянинг расмий оммавий ахборот воситалари эса вакцина ҳақидаги хабарлар ҳақиқатга тўғри келмаслигини билдирди.
Исроил тўққиз миллионлик аҳолиси учун етарли миқдорда вакцинага эга, аҳолининг ярми камида бир марта эмланди. Сурияда эса эмлаш ишлари ҳали бошлангани йўқ.
Исроил армияси асир тушган фуқаро суриялик икки чўпонга алишилганини айтди. Мудофаа вазирлиги Сурияга вакцина берилгани ҳақидаги хабарларни цензура қилган.
