Эрдўған Қошиқчининг ўлимидаги сирларни очишни талаб қилди

Эрдўған Қошиқчининг ўлимидаги сирларни очишни талаб қилди

Туркия президенти Ражаб Тоййиб Эрдўған саудиялик журналист Жамол Қошиқчининг ўлдирилиши аввалдан пухта режалаштирилгани ҳақида гапирди. Бу ҳақда Kun.uz The Guardian'га таяниб хабар бермоқда.

Эрдўғаннинг сўзларига кўра, бу қотиллик Қошиқчи Саудия Арабистонининг Истанбулдаги бош консулхонасига ташриф буюришидан бир неча кун олдинроқ режалаштирилганди. Унинг айтишича, бу қотиллик амалга оширилишида Саудия Арабистонидан келган икки гуруҳ иштирок этган.

Биринчи гуруҳ 3 кишидан иборат бўлган, улар қотиллик кунидан бир неча кун олдин Туркияга келиб, Истанбулдан 88 километр масофадаги Белград ўрмонида кузатув ишларини олиб боришган. Тахмин қилинишича, улар Қошиқчининг жасади бўлакларини яшириш учун жой излашган. 15 кишидан иборат бўлган иккинчи гуруҳ 2 октябрь куни, қотиллик амалга оширилган кунда Истанбулга келган. Мутахассислар кузатув камераларини ўчиришган, қаттиқ дискларни олишган ва ёзувларни ўчиришган. Бу гуруҳ таркибида генераллар ва бошқа амалдорлар ҳам бўлган.

Туркия президенти бу ҳодисани шафқатсизлик ва қолоқлик деб баҳолади ҳамда Саудия Арабистони ҳукуматидан журналистнинг ўлими бўйича саволларга жавоб беришни талаб қилди.

У Истанбулдаги қотиллик учун жавобгарлар топилиб, Истанбулда судга тортилиши кераклигини таъкидлади.

Шу билан биргаликда, Эрдўған бу қотилликдан бехабар бўлганини айтаётган Саудия Арабистони қироли Салмон ибн Абдулазиз Ол Сауднинг сўзлари ростлигига шубҳа қилмаслиги, ҳозирда асосий масала қотилликни ким буюртма қилганини аниқлаш эканини айтиб ўтган.

Эрдўған журналист ўлими тўғрисидаги барча ҳақиқатларни фош этишга ваъда берган.

Саудия ҳокимиятини танқид остига олиб келган журналист Жамол Қошиқчи 2 октябрь куни Саудия Арабистонининг Истанбулдаги бош консуллиги биносига кириб кетганидан кейин изсиз ғойиб бўлганди.

17 октябрь куни оммавий ахборот воситалари журналист консуллик биносида қийноққа тутилгани ва боши танасидан жудо қилинганини хабар қилишди. Уни сўроқ қилиш чоғида бош консул ўзи ҳам иштирок этгани тахмин қилинди.

20 октябрь куни Саудия Арабистони ҳукумати журналистнинг ўлимини тасдиқлади. Лекин Саудия Арабистони бош прокуратураси маълумотида, консулхонада жанжал келиб чиқиши оқибатида журналистни бехосдан ўлдириб қўйишгани айтилганди.

Manba: azon. uz


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!