Чавушўғли: 550 мингдан ортиқ суриялик ўз уйларига қайтди
Туркияда бошпана топган 550 мингдан ортиқ суриялик қочқин Сурия шимолидаги терроризмдан тозаланган ҳудудларга қайтди. Бу ҳақда Туркия ташқи ишлар вазири Мевлут Чавушўғли маълум қилди.
“Биз 553 минг қочқинни террорчилардан тозалаган ҳудудларга юбордик”, деди дипломат НТВ телеканали эфирида.
Унга кўра, Сурия шимолида 240 минг уй қурилади, у ерда 1 миллион қочқин жойлаштирилади.
“Биз сурияликларни нафақат хавфсизлик зоналарига, балки [Башар ал-Ассад] режими назорати остидаги ҳудудларга юбормоқчимиз”, деди вазир.
Туркия ТИВ раҳбари Сурия бўйича Туркия, Россия Федерацияси, Эрон ва Башар ал-Ассад режими вакиллари иштирокида тўрт томонлама учрашувлар ўтказиш муҳимлигини таъкидлади.
“Ташқи ишлар вазирларининг Москвадаги сўнгги йиғилишида биз сурияликларнинг режим назоратидаги ҳудудларга хавфсиз қайтиши учун инфратузилмани тайёрлашга келишиб олдик. Вазир ўринбосарлари даражасида комиссия тузишга қарор қилинди”, — деди у.
Чавушўғли Суриядаги террор таҳдидининг бартараф этилиши унинг хавфсизлиги ва барқарорлигини таъминлаш учун зарур эканлигини таъкидлади.
