Бўлдими, бўлмадими? "Толибон" ва туркман чегарачилари ўртасидаги отишма хусусида
"Толибон" ва туркман чегарачилари ўртасидаги отишма ҳақида турли фикрлар бор.
Etilaatroz'нинг "Толибон" жанговар бўлинмаларидаги манбага таяниб хабар беришича, Ҳамяб минтақасидаги чегарадаги тўқнашувлар туфайли Акина порти ўз ишини тўхтатиб қўйган. Фақат бугун эрталаб, "Толибон" туркман томони билан бу ҳақда келишиб олгандан кейин у фаолиятини қайта тиклаган. Шу сабабли Акинадан 40 га яқин бўш контейнер Туркманистонга жўнаб кетди.
Ушбу манбага кўра, жанг натижасида туркманлар 4 аскарини йўқотган ва яна 4 нафари яраланган. Афғонистон томонида аввалроқ бир фуқаро ҳалок бўлган, яна бири яраланган.
Бироқ қўшни Фарёб вилояти маданият ва ахборот бошқармаси бошлиғи Шамсуллоҳ Муҳаммадий Акина портининг бир кунга ёпилишини рад этади. Расмий Кобул ва Ашхобод чегарада ҳеч қандай ҳодиса бўлмаганини таъкидламоқда.
