Бугун Шаҳрам Ғиёсов фаолиятидаги энг кучли рақибга қарши рингга чиқади
Ҳаваскор боксда жаҳон чемпиони, Олимпия ўйинлари совриндори, айни пайтда профессионал рингда фаолиятини давом эттираётган Шаҳрам Ғиёсов бугун Лондон шаҳридаги машҳур «Уэмбли» стадионида ўзининг навбатдаги жангини ўтказади.
Жангда ўзбекистонлик боксчига никарагуалик Хулио Лагуна рақиблик қилади. Шаҳрам шу кунгача проф рингда тўрт маротаба жанг қилиб, уларнинг барчасида ғалаба қозонган (3таси нокаут). Лагуна эса 14та жанг ўтказган ва уларнинг барчасида ғолиб бўлган. 10та жангни муддатидан олдин якунлаган.
Шаҳрам Ғиёсовнинг ўзи бу сафарги рақиби энг кучлиси эканини қайд этиб ўтган.
Шаҳрам Ғиёсов шу йилнинг 11 март куни Нью-Йоркда ўтказилган жангда аргентиналик рақиби Николас Веласкесни (10-0-2) биринчи раунднинг 7-сониясидаёқ полга қулатди. У апрель ойида Бруклинда венгриялик Габор Горбисни (24-0-10) 6 раундлик жанг якунига кўра енгди, 15 июль куни мексикалик Даниэль Эчеверрияни (19-0-5) нокаутга учратди, 17 август санасида эса ганалик Альберт Менсани (31-1-7) нокаутга учратган ҳолда ғалабага эришди.
Шаҳрам Ғиёсов 1993 йилнинг 7 июль куни Бухорода туғилган. Ҳаваскор боксда жаҳон чемпиони (2017 йил), Олимпия ўйинлари совриндори (2016 йил), Осиё чемпиони (2017 йил). 2015 йил Якутскда бўлиб ўтган ёшлар ўртасидаги жаҳон чемпионатида олтин медални қўлга киритган.
Никарагуалик Хулио Лагуна (14-0, 10 КО) биринчи ярим ўрта вазн тоифасида WBA Fedecentro ва WBC FECARBOX камарларига эгалик қилади.
Бугунги жанг Тошкент вақти билан соат 22:00да бошланади.
Шунингдек, «Уэмбли» стадионидаги бокс оқшомидан йилнинг асосий жангларидан бири ўрин олган. Икки олимпия чемпиони, ўз мамлакатларининг оғир вазндаги энг кучли боксчилари, буюк британиялик 28 ёшли Энтони Жошуа ҳамда россиялик 38 ёшли Александр Поветкин ўзаро рингга чиқади.
