Байденнинг уйидан яна 6 та махфий ҳужжат топилди
ФҚБ АҚШ президенти Жо Байденнинг Делавер штатидаги Уилмингтон шаҳридаги уйини тинтув қилиш чоғида олтита махфий ҳужжат топди. Бу ҳақда CNN давлат раҳбарининг адвокати Боб Бауэрга таяниб хабар берди.
Қайд этилганидек, қидирув ишлари ўтган жума, 20 январь куни амалга оширилган ва тахминан 13 соат давом этган. Топилган ҳужжатлар Байденнинг Сенатдаги ва АҚШ вице-президенти лавозимларида ишлаган даврига тегишли. Тинтув вақтида президентнинг ўзи бўлмаган.
Аввалроқ Америка оммавий ахборот воситалари Байдендан топилган махфий ҳужжатлар ҳақида икки марта - унинг Вашингтондаги Пенн-Байден дипломатия ва глобал ҳамкорлик таҳлилий марказидаги шахсий кабинетида ва Уилмингтондаги уйи гаражида хабар берган эди. Қонунга кўра, президент ҳужжатларни сақлаш учун Миллий архивга топшириши керак эди.
АҚШ Бош прокурори Меррик Гарленд Роберт Хурни Байденнинг уйида махфий ҳужжатлар топилишини текшириш учун махсус маслаҳатчи этиб тайинлади.
