Аргентина жаҳон чемпионатини тарк этди: омадсизликнинг сабаблари нимада?

2018 йилги жаҳон чемпионати нимчорак финалининг дастлаби ўйини якунланди. Чемпионатнинг финал ўйинига тенг бўлган Франция – Аргентина тўқнашувида французлар 4:3 ҳисобида зафар қучишди. Месси ва унинг жамоадошлари мусобақани эрта тарк этадиган бўлишди. Хўш, Аргентинанинг мазкур омадсизлигининг сабаби нима?

БОШ МУРАББИЙ МУАММОСИ

Кўпчилик жаҳон чемпионатидан олдин Аргентина терма жамоасининг асосий муаммоси таркиб деб изоҳлаётганди. Аммо мундиал давомида маълум бўлдики, асосий муаммо Хорхе Сампаоли, яъни бош мураббий экан. Сампаоли шундоқ ҳам барқарор бўлмаган таркибни янада чалкаштириб юборди. Биз жаҳон чемпионатида терма жамоада умуман номи маълум бўлмаган, фақат аргентиналиклар ва Хорхе Сампаолигагина маълум бўлган футболчиларни кўрдик. Ўзингиз таққосланг: Меркадо ва Меса каби футболчилар Дибала ва Игуаин каби футболчиларнинг ўрнига тушишга арзирмиди? Ёки Кристиан Павон Агуэродан устунроқми? Тўғри, Павон ёшдир, аммо чемпионатда кўпроқ тажрибали футболчилар асқатишини Сампаоли билиши керак эди. Аксига олиб Аргентина таркибидаги ёш футболчилар Мпаббе капи иқтидорга, тезликка эга эмасга ўхшаб қолди.

Агуеро майдонга тушганидан кейин ўйин ўзгарганини сезгандирсиз. Тажрибали футболчилар шунақа бўлишади. Шахсан биринчи бўлимда Америка қитъаси вакиллари 68 фоиз устунликка эга бўлишди. Аммо Ди Мариянинг узоқдан йўлланган зарбасини ҳисобга олмаганда тузук зарба ҳам берилмади. Аргентина терма жамоасининг биринчи таймда позицион ҳужум натижасида бирор марта хавфли зарба йўллаганини кўрдингизми? Йўқ. Бу кимнинг айби — Сампаолининг.

ФРАНЦУЗЛАР — КУЧЛИ

Тан олиш керак, Франция терма жамоаси айни дамда Аргентинадан кучли. Сабаби франсузларнинг ҳар бир чизиғида юлдуз футболчи ўйнайди. Таркибда барқарорлик бор, Льорис АПЛда тобланган ва тобланмоқда, Умтити ва Варан Ла Лиганинг икки етакчи жамоасида тўп суради, Погба, Гризманн, Мбаппе, Жиру, Канте — булар ҳам кучли бешлик чемпионатларида ўйнашади. Улар халқаро мусобақаларда етарлича тажриба тўплашган. Хўш, Аргентина терма жамоасининг таркибини шундай таҳлил қилиб кўрингчи? Менимча, фарқни сездингиз.

Бу Франция терма жамоаси финалга чиқса ажабланмаймиз. Аргентина эса уйига қайтишга ва 2022 йилги чемпионатга янада кучлироқ тайёрланишга мажбур.

Фикрларимиз кўп, аммо, бизнингча, ҳамма ўзи учун керакли хулосани чиқариб бўлди.