32 нафар масъул ходимга нисбатан интизомий жазо чоралари қўлланилган

АОКАда ўтказилган галдаги брифинг “Ўзбекнефтгаз” АЖ молиявий ва комплаенс назорат департаменти томонидан жорий йил биринчи чоракда амалга оширилган ишларга бағишланди.

Ушбу ташкилотнинг молиявий ва комплаенс назорат департаменти бошлиғи Эркин Омоновнинг айтиб ўтишича, Коррупцияга қарши курашиш агентлиги томонидан эълон қилинган 2024 йил якуни бўйича рейтингда жамият 92 балл тўплаб, бешинчи ўринни эгаллаган.

Қайд этилгани каби ўтган даврда департамент ходимлари томонидан 1 та комплекс ва 3 та мавзули ўрганиш ҳамда 1 та хизмат текшируви ўтказилган бўлиб, хато-камчиликлар аниқланган. Ҳозирга қадар уларни бартараф этилиши таъминланган. 4 та ўрганиш ҳужжати ҳуқуқни муҳофаза қилувчи органларга ҳуқуқий баҳо бериш ва қонуний чора кўриш учун юборилган.

Аниқланган хато-камчиликлар юзасидан 32 нафар масъул ходимга нисбатан интизомий жазо чоралари қўлланилган бўлса, 1 нафар ходим эгаллаб турган лавозимидан озод этилиб, бошқа ишга ўтказилган. 2 нафар ходим билан тузилган меҳнат шартномалари бекор қилинган.

Марказий аппарат томонидан харид жараёнларини мониторинг қилиш давомида 211 та баённома, шартномалар, қўшимча келишув лойиҳалари белгиланган муддатларда кўриб чиқилган. Ҳудудий комплаенс инспекторлари 1 398 та шартномани ўз муддатида кўриб чиқиб, хато-камчиликлар аниқлаган.

– Коррупцион ҳолатларнинг олдини олишга ҳар бир ходим масъулдир. Шунга кўра, тизимдаги раҳбар ва масъул ходимлар 2 653 та манфаатлар тўқнашуви бўйича декларация тўлдирган. Жумладан, корхоналарда жами 136 та, шундан 18 та реал ва 118 та потенциал манфаатлар тўқнашуви ҳолати мавжуд бўлса-да, реал манфаатлар тўқнашувини бартараф этиш учун масъуллар томонидан чоралар кўрилмаганлиги аниқланиб, тегишли тадбирлар амалга оширилмоқда. Йўриқномага мувофиқ, ҳудудий комплаенс инспекторлари 74 та ишга кирувчи номзод ўрганиб, шундан 72 та ҳолатда “ижобий” ва 2 та ҳолатда “салбий” хулоса берган, – деди Э.Омонов.

Шунингдек, тадбирда коррупцион ҳолатларга қарши курашишга доир зарур билим ҳамда кўникмага эга бўлиш мақсадида ўқувлар ташкил этилаётганига урғу берилди. Унга кўра, жамият тасарруфидаги 22 та бошқарма ва корхонада 4 мингдан ортиқ ходим иштирокида 60 га яқин семинар-тренинг ташкил этилди. Бундан ташқари, давлат харидлари соҳасида шахсий манфаатлар тўқнашувининг олдини олиш бўйича Иқтисодиёт ва молия вазирлиги томонидан ишлаб чиқилган дастур асосида ўтказилган онлайн ўқув машғулотларида 300 нафарга яқин ходими иштирок этиб, гувоҳномаларга эга бўлди.

Департамент бошлиғининг таъкидлашича, харид шартномаларини тузиш ҳамда маблағ кўчириш билан боғлиқ сўровларига асосан 30 та чет эл ва маҳаллий корхонанинг санкциявий рўйхатларда мавжудлиги юзасидан текширувлар ўтказилиб, тегишли хулосалар тақдим этилган.