Зеленский Кремлда урушни тўхтатиш тарафдорлари борлигини айтди

Украина президентига кўра, Путин атрофидаги айрим шахслар урушни тугатиш ва тинчликка эришишни қўллаб-қувватламоқда.

Украина президенти Владимир Зеленский Россия президенти Владимир Путин атрофидаги айрим вакиллар урушни тугатиш тарафдори эканини ва «тинчликнинг муқобили йўқ» деб ҳисоблашини билдирди.

Кечки мурожаати давомида Зеленский, шунингдек, Россияда «бензин инқирози» тобора кучайиб бораётганини таъкидлаб, буни Москва ҳарбий ҳаракатларни тўхтатишдан бош тортганининг табиий оқибати деб атади.

«Биз тинчликни яқинлаштириш бўйича таклифлар киритдик ва бу борада нафақат дунёдаги ҳамкорларимиз, балки Путин атрофидаги айримлар ҳам бизни қўллаб-қувватламоқда», — деди Украина президенти.

Бундан ташқари, Зеленский Украина амалга оширган узоқ масофали зарбалар Россиянинг бир нечта ҳудудига, шунингдек, Москва назорати остидаги Украина ҳудудларига ҳам етганини маълум қилди. Унинг сўзларига кўра, Киев бундай зарбаларни амалга ошириш имкониятларини янада кенгайтиришни режалаштирмоқда.

Украина президенти, шунингдек, Қуролли кучлар таркибида узоқ масофали операциялар учун масъул бўладиган махсус қўмондонлик ташкил этилганини эълон қилди. Ушбу тузилма Россиянинг ҳарбий салоҳиятини янада қисқартиришга қаратилган барча мавжуд ресурсларни мувофиқлаштиради.

Россия томони ҳозирча Зеленскийнинг сўнгги баёнотларига расмий муносабат билдирмаган.