Янги президент жамоатчилик олдида коронавирусга қарши эмланишга ваъда берди
Американинг йирик ОАВлари томонидан АҚШнинг сайланган президенти деб эътироф этилаётган Жо Байден жамоатчилик олдида коронавирус инфекциясига қарши эмланишга тайёрлигини билдирди.
«Мен буни мамнуният билан амалга ошираман», — деди Байден.
Сиёсатчи шу тариқа инаугурациягача вакцина олиш-олмаслиги ҳамда буни АҚШнинг собиқ президентлари кичик Жорж Буш, Билл Клинтон ва Барак Обама каби жамоатчилик олдида амалга оширишга тайёр ёки йўқлиги ҳақидаги саволга жавоб берди.
Байденнинг аниқлик киритишича, АҚШ аллергик ва юқумли касалликлар миллий институти директори Энтони Фаучи вакцинанинг хавфсизлигини эътироф этиши билан уни олишга тайёр бўлади.
Байденнинг сўзларига кўра, АҚШ халқининг вакцина самарадорлигига нисбатан ишончи тушиб кета бошлаган, шунинг учун сиёсий етакчилар америкаликларга шахсан намуна кўрсатиши муҳимдир.
Аввалроқ АҚШнинг собиқ президентлари Барак Обама, Жорж Буш ва Билл Клинтон камера қаршисида коронавирусга қарши вакцина билан эмланиб, жамоатчиликнинг хавфсизликка бўлган ишончини оширишга тайёрлигини билдирган эди.
Амалдаги АҚШ президенти Дональд Трамп ҳам АҚШда биринчи бўлиб коронавирусга қарши вакцинани қабул қилишга тайёрлиги ҳақида айтган эди. «Мен мамнуният билан вакцинани қўллайдиган биринчи одам бўлишга тайёрман… асосийси — Америка халқига фойда келтириш», — деган у.
