Туркиядаги локдаун сайёҳларга тааллуқли эмас
Туркияда 29 апрелдан кучга кирадиган тўлиқ локдаун хорижий сайёҳларга тааллуқли бўлмайди. Улар комендантлик соатига амал қилиш талабини бажаришдан озод қилинадилар.
Аввалроқ Туркия президенти Ражаб Тоййиб Эрдўған мамлакатда коронавирус билан боғлиқ оғир вазият сабабли 29 апрелдан 17 майгача тўлиқ локдаун киритилишини эълон қилганди.
Туркия ички ишлар вазирлигининг ҳужжатида мамлакатга туризм мақсадида қисқа муддатга келган хорижий сайёҳлар локдаун вақтидаги комендантлик соатига риоя қилиш мажбуриятидан озод қилинишлари кўрсатилган. Шу билан бирга, Туркияда яшаш ҳуқуқига эга бўлган хорижликлар ёки вақтинча халқаро ҳимоя остида бўлганлар комендантлик соатига амал қилишлари керак бўлади.
Шу тариқа, сайёҳлар кўчага чиқишлари, жамоат транспортидан фойдаланишлари ва ўзлари турган меҳмонхонадан исталган узоқликдаги дўконларга ташриф буюришлари мумкин бўлади.
Мамлакатда тўлиқ локдаун киритилмагунча ҳам карантин чекловлари хорижий сайёҳларга нисбатан амал қилмаганди. Улар транспортда эркин ҳаракатланишган ва музейларга бора олишган.
Бироқ маҳаллий ОАВда таъкидланишича, мамлакатнинг баъзи сайёҳлик ҳудудларида маҳаллий аҳоли ва яшаш ҳуқуқига эга бўлган хорижликлар томонидан ушбу қоидаларни суиистеъмол қилиш ҳолатлари қайд қилинмоқда.
Cumhuriyet нашрининг ёзишича, полиция комендантлик соати амал қилиш вақтида кўчада юрганларни текшириш учун кўпроқ патрулни жалб қилишига тўғри келмоқда.
Полиция маълумотларига кўра, ўтган дам олиш кунлари комендантлик соатини бузганлик учун яшаш ҳуқуқига эга бўлган ўнлаб хорижликлар ва ўзини сайёҳ қилиб кўрсатмоқчи бўлган бир неча маҳаллий фуқаро жаримага тортилган.
