Туркияда "Абдукарим Мирзаев иши" расман тугади (ВИДЕО)

Туркияда яшаётган ўзбекистонлик журналист Абдукарим Мирзаевга нисбатан гумонларнинг ҳеч бири тасдиқланмади. У 2020 йил декабрида турк полицияси томонидан қўлга олиниб, бир ой тутқунликда сақланган эди.

2020 йил охирида Истанбулда қўлга олиниб, 33 кун давомида ҳибсда бўлган ўзбек журналисти Абдукарим Мирзаев иши бўйича суд бўлиб ўтди. Бу ҳақда у 2 август куни MFaktor лойиҳасида намойиш қилинган интервьюсида маълум қилди, деб ёзади Кун нашри.

“Навбатимиз келмаётгани учун маҳкама чўзилиб келаётганди. Кеча биз ҳақимиздаги ҳар қандай шубҳалар ариди. Бизга нисбатан нотўғри ҳаракат бўлгани судда айтилди.

Албатта, оқланишимга ҳеч шубҳам йўқ эди. Лекин барибир қоғозда тасдиқланганидан кейин одам тўла хотиржам бўларкан”, – деди Абдукарим Мирзаев.

Аввалига “Ёшлар” телерадиоканалидаги чиқишлари, кейинчалик ижтимоий тармоқларда маърифий ҳикоялари билан танилган журналист 2020 йилнинг 11 декабрига ўтар кечаси Истанбулда қўлга олинганди. Унинг уйида тинтув ҳам ўтказилган.

Турк полицияси Мирзаевни шубҳали шахслар билан алоқада бўлганликда гумонлаган. Кейинчалик нафақат журналист, балки у билан мулоқотда бўлгани тахмин қилинган шахсларга нисбатан ҳам гумонлар тасдиқланмаган эди.

Адвокатга кўра, Туркия ҳуқуқ органларига Абдукарим Мирзаевга тегишли рақам орқали шубҳали шахслар билан мулоқотда бўлингани ҳақида хабар келиб тушган, бу маълумот ортидан журналист кузатилиб, сўнгра қўлга олинган.

Ўзбекистон фуқароси депортация марказига ўтказилгач, январ ойининг ўрталаригача ушбу муассасада сақланганди.