Телефон одоблари

• Бировга қўнғироқ қилишдан, қисқа хат ёзишдан олдин унинг рақамини аниқлаб олиш лозим.

• Қўнғироқ қилишдан олдин қўнғироқ қилинаётган шахс истироҳат қилаётган ёки қилмаётгани, банд ёки банд эмаслигини аниқлаб олиш керак.

• Бир марта қўнғироқ қилганда жавоб берилмаса, орадан бироз муддат ўтказмай туриб, қўнғироқни қайтариш беодобликдир.

• Уч марта қўнғироқ қилингандан кейин ҳам жавоб бўлмаса, қўнғироқ қилишни тўхтатиш лозим.

• Чақирилган одам алоқага чиққанда, чақирувчи биринчи бўлиб салом бериши керак.

• Қўнғироқ келганда, гўшакни олгач, “Лаббай” ёки шу каби гўзал ибора билан сўз бошлаш одобдандир.

• Уяли алоқа воситасида узоқроқ гаплашмоқчи бўлган одам суҳбатдошидан изн сўраши лозим.

• Уяли алоқа воситасида сўзлашиш давомида кавшаниб туриш ўтакетган беодобликдир.

• Телефонда овозини сохталаштириб гапириш ёки ёлғон хатлар ёзиб, ўзгаларни масхара қилиш мумкин эмас.

• Ўзаро сўзлашувни тамомлагач, гўзал сўзлар ва эзгу тилаклар билан хайрлашиш керак.

•  Бировнинг телефон рақамини ўзининг рухсатисиз бошқаларга бермаслик талаб этилади.

• Чиқимдан қочиб, бировнинг телефонига рақамини чиқариб қўйиш ва унинг жавоб қайтаришини кутиш беодобликдир.

• Қўнғироқ бўлган пайтда жавоб беролмаган киши имкон топган заҳоти жавоб қайтариши лозим.

• Ўзига келган ҳар қандай хатни бошқаларга тарқатавериш мумкин эмас.

• Кишиларга уяли алоқа воситаси орқали хат ёзишда ҳам одоб-ахлоқ, шариат чегараларига риоя қилиш лозим.

 Шайх Муҳаммад Содиқ Муҳаммад Юсуф. 
“Ижтимоий одоблар” китобидан

Манба: Fitrat.uz