“Қашқадарёдаги МИБ фаолияти бошқадарёчами?”. Бюро муносабат билдирди

Жорий йилнинг 19 март куни “Rasmiy.uz” телеграм каналида “Қашқадарёдаги МИБ фаолияти бошқадарёчами?” сарлавҳали хабар жойлаштирилди. Унда суд қарори ижроси таъминланмаётганлиги ҳақида баён этилган. Ушбу хабар Бюронинг Қашқадарё вилоят бошқармаси томонидан ўрганилди.

Аниқланишича, Бюронинг Нишон туман бўлими иш юритувига Фуқаролик ишлари бўйича Қарши туманлараро судининг 27.01.2022 йилдаги ижро варақасига асосан ундирувчи Ф.Иботова ва С.Иботовалар фойдасига барча мерос мол-мулклар ҳисобидаги улуши учун жавобгар С.Сахибов ва бошқалардан жами 106 млн. 84 минг сўм компенсация пули ундириш тўғрисидаги ижро ишлари бўлим иш юритувига 01.03.2022 йилда келиб тушган ва ижро иши юритишни қўзғатиш тўғрисида қарор қабул қилинган.

Давлат ижрочиси томонидан қарздорларнинг номида мол-мулклари аниқланмаган ва уларнинг Республика ҳудудидан чиқиш ҳуқуқлари вақтинча чекланган.

Шунингдек, қарздор С.Сохибовга нисбатан давлат ижрочисининг 26.10.2022 йилдаги қарорига асосан Ўзбекистон Республикаси МЖтКнинг 198-1-моддасига кўра, базавий ҳисоблаш миқдорининг 5 баравари яъни 1 млн. 500 минг сўм маъмурий жарима қўлланилган ва давлат фойдасига ундирилган.

23.03.2023 йилда бўлим давлат ижрочиси томонидан мерос сифатида қолдирилган “Sohib petrol” номли автомобилларга газ қуйиш шохобчаси хатлаб олинган. Келгусида, қарздорлик тўлаб берилмаганда, ушбу хатланган мулкни электрон онлайн-аукционларни ташкил этиш маркази орқали “E-IJRO AUKSION” ягона электрон савдо майдончасида сотиш учун чиқарилиб, сотувдан тушган пул маблағи, қарздорликни қоплашга йўналтирилади.