Ниҳоят ЖССТ вакилларининг Хитойга киришига рухсат берилди
Коронавируснинг келиб чиқишини ўрганадиган халқаро экспертлар бир неча кун кейин Хитойнинг Ухан шаҳрига келади.
Жаҳон Соқлиқни Сақлаш Ташкилоти (ЖССТ)нинг маълум қилишича, Хитой ҳукумати 11 январь куни ниҳоят халқаро экспертларнинг мамлакатга киришига рухсат берган. Олимлар 14 январда Хитойга келади ва икки ҳафталик карантиндан кейин тадқиқотларга киришади.
ЖССТ ва Пекин ўртасида коронавируснинг келиб чиқишини аниқлаш бўйича музокаралар бир неча ойдан бери давом этаётган эди. 5 январь куни ЖССТ раҳбари Тедрос Адханом Гебрейесус халқаро экспертларнинг Хитойга киритилмаётганидан ишкоят қилди. Хитой эса кечикишни экспертларда айрим ҳужжатлар йўқлиги ва делегацияни кутиб олишга тайёргарлик кўриш билан боғлиқ қийинчиликлар билан изоҳлади.
Эслатиб ўтамиз, янги коронавирус 2019 йилнинг декабрида илк бор айнан Хитойнинг Ухан шаҳрида аниқланган эди. Ҳозирга келиб бутун дунёда ушбу инфекция юққанлар сони 91 миллиондан ошиб кетди.
Охирги вақтда Хитой ҳукумати янги коронавирус Уханда аниқланишидан олдин бошқа мамлакатларда бўлгани тўғрисида маълумотларни тарқатяпти. Бунга исбот сифатида эса музлатилган маҳсулотларда вирус изи аниқланганини келтирмоқда.
