Фазлиддин Ғоибназаров мағлубиятга учради (видео)
Профессионал бокснинг супер енгил (-63,5 кг) вазн тоифасида рингга чиқаётган ўзбекистонлик Фазлиддин Ғоибназаров 12 май тонгида ўзининг саккизинчи жангини ўтказди.
АҚШнинг Аризона штати Туксон шаҳрида бўлиб ўтган жангда унга америкалик Майкл Фокс (20 та ғалаба, 1 та мағлубият) рақиблик қилди. 10 раундга мўлжалланган жанг тўлиқ давом этди. Ҳакамлар очколар бўйича Фокс ғалаба қозонганини эътироф этди. Унга кўра, 96-92, 96-92, 95-93 ҳисобларида Майкл Фазлиддин устидан ғалаба қозонди.
Қайд этиш жоиз, Фазлиддин профессионал рингдаги саккизинчи жангида ўзининг дастлабки мағлубиятини қабул қилиб олди. У бунгача ўтказилган 7 та жангнинг барчасида ғалаба қозонганди.
Эслатиб ўтамиз, Фокс уч ой муқаддам ўзбекистонлик бошқа бир боксчи Шоҳжаҳон Эргашевга очколар ҳисобига ютқазганди.