Черногорияда Ўзбекистон фуқароларига киришига рухсат этилди

Черногория Жамоат соғлиқни сақлаш институти COVID-19 чекловларисиз мамлакат ҳудудига кира оладиган хориж давлатлари фуқароларининг янгиланган рўйхатини эълон қилди. Бу ҳақда «РИА Новости» хабар берган.

Рўйхатга Беларусь, Украина, Тожикистон, Ўзбекистон ва Грузия киритилган. Тиват шаҳрига Беларусдан амалга ошириладиган биринчи чартер рейс 10 июлда парвоз қилади.

«Черногория юздан ортиқ давлатларнинг фуқаролари учун 1 июндан бошлаб чегараларини очган, аммо Беларусь мазкур рўйхатга кирмаган эди. Биз COVID-тестларнинг ‘манфий’ жавобисиз Черногорияга боришга рухсат берилишини кутгандик ва парвоз дастури бир неча марта бекор қилинганди. Лекин энди барчаси ўзгарди ва рейслар ҳар куни амалга оширилади», — дейди Беларусдаги маҳаллий туроператор директори Руслан Сегенюк.

Унинг сўзларига кўра, бозорда талаб юқори энг биринчи рейс тўлиб бўлган, бўш жойлар қолмаган. 11 ва 12 июлда парвозларни амалга оширадиган самолётлар 50 фоизга тўлган.

Бир ҳафталик саёҳат нархи икки киши учун 830 евродан бошланади. Черногория — Минскдан чартер рейс орқали саёҳат қилиш мумкин бўлган тўртинчи мамлакат. Аввал Беларусь фуқаролари учун Албания (Тирана), Туркия (Анталия ва Измир), Миср (Хургада ва Шарм-ал-Шайх) давлатларига саёҳат қилиш имкони яратилганди.

25 майда Черногория коронавирусни енгган Европадаги биринчи давлатга айланган, бир ойдан кейин, 27 июнда эса мамлакатда яна қатъий карантин режимига қайтилгани ҳақида хабар берилган. Евроиттифоқ 1 июлдан бошлаб ташқи чегараларини очган 14 та мамлакат рўйхатига Черногория ҳам киритилган.