"Бу сиёсий тизимнинг ўз-ўзини фош қилишидир..."
"Давлат думасига урушга қарши шиорлар билан чиққан "Яблоко" партиясини сайловдан четлатиш ҳақидаги Олий суд қарори ҳокимиятнинг қўрқиб қолганидан далолат беради", — деди "Яблоко" федерал сиёсий қўмитаси раиси Григорий Явлинский.
Сиёсатчининг таъкидлашича, партия сайловларга "Тинчлик ва озодлик учун!" дастури билан борган. "Яблоко" аъзолари ўт очишни тўхтатиш, дипломатия ва тинчлик тарафдори бўлиб, ядровий уруш ҳамда сиёсий қатағонларга қарши чиқмоқда.
Явлинскийнинг сўзларига кўра, турли қараш ва позициядаги инсонлар партияни айнан унда "жуда оддий, қисқа ва мутлақо аниқ дастур" бўлгани учун қўллаб-қувватлаган.
"Айнан шундай дастурга эга партиянинг ҳеч бир реал асосларсиз сайловдан олиб ташланиши, бу сиёсий тузумнинг ўз-ўзини фош қилишидир. Бу қарор дастуримизнинг муҳимлиги ҳақида ҳар қандай расмий сайлов натижаларидан кўра кўпроқ нарсани англатади. Очиқ-один кўриниб турибдики, бугунги кунда тинчлик ва озодликка бўлган талаб ҳокимият тахмин қилганидан анча кучлироқ бўлиб чиқди.
"Партиянинг сайловлардан четлатилиши ҳокимият учун ноқулай саволларни бераётган одамлар билан мулоқот қилишдан бош тортишни англатади. Гап фақат "Яблоко" номзодлари ҳақида эмас, балки уларни қўллаб-қувватлаётган ёки қўллаб-қувватлаши мумкин бўлган кишилар ҳақида бормоқда.
Ҳокимият бундан қўрқиб кетди ёки буларнинг барчасини тушунмаяпти ва "Яблоко"ни сайловлардан олдириб ташламоқда", — деб таъкидланган баёнотда.
