Байден ва Путиннинг оғзаки “жангига” Эрдўған судьялик қилмоқчи
Туркия президенти Ражаб Тоййиб Эрдўған Жо Байден томонидан ўзининг россиялик ҳамкасби Владимир Путин ҳақидаги билдирган фикрлари “қабул қилиб бўлмайдиган” ва АҚШ президентига мос келмайдиган иш эканини айтди.
Эслатиб ўтамиз, Байден яқинда берган интервьюсида Путинни “қотил” деб атаганди.
Бу ҳақда 17 март куни Жо Байденнинг журналистларга берган интервьюси эълон қилинди. Унда АҚШ президенти “Путинни қотил деб ўйлайсизми?” деган саволга “ҳа” деб жавоб берди. Бу Москва ва Вашингтон ўртасидаги муносабатларни янада ёмонлаштирди. Шундан кейин Путин Байденга жавоб қайтариб, ким уни қотил деб атаган бўлса, ўша шахснинг ўзи қотиллик қилганини айтди.
«Жаноб Байденнинг жаноб Путин ҳақидаги баёнотлари президентга мос келадиган сўзлар эмас. Россия каби давлат президентига қарши бундай сўзларнинг ишлатилиши ҳақиқатан ҳам қабул қилиниши мумкин эмас ва бу жим қараб туриладиган нарса эмас. Менинг фикримча, жаноб Путин жуда ақлли жавоб қайтариб, керакли ишни амалга оширди” дейди Эрдўған.
Ливия ҳамда Сурияда жанг қилаётган қарама-қарши томонларни қўллаб-қувватлаётганларига қарамай Туркия ва Россия ўртасидаги муносабатлар сўнгги йилларда анча қалинлашди. Туркия Россиядан қуроллар сотиб олмоқда. Туркия президенти Эрдўған Путинни ўзининг дўсти экани таъкидлайди.
