АҚШ Ўзбекистоннинг бўлажак рақибидан 21 кунлик карантин талаб қилди

Шу йилнинг 11 июнидан 19 июлига қадар Шимолий Америка қитъасининг уч давлати — АҚШ, Канада ва Мексика мезбонлик қиладиган Жаҳон чемпионати старти арафасида жиддий муаммо юзага келди. Мусобақа йўлланмасини қўлга киритган Конго Демократик Республикаси (ДР) терма жамоасининг мундиалдаги иштироки хавф остида турибди.

Бунга мамлакатда хавфли Эбола вирусининг тарқалгани сабаб бўлган. Вазият туфайли АҚШ ҳукумати Конго делегациясининг барча аъзолари зиммасига мамлакатга киришдан олдин расман 21 кунлик мажбурий изоляция (карантин) муддатини ўташ талабини қўйди. Терма жамоанинг океан ортидаги ЖЧ баҳсларида қатнашиши фақатгина ушбу тиббий шарт тўлиқ бажарилганидан сўнг кафолатланади.

Жаҳон соғлиқни сақлаш ташкилоти (ЖССТ) ўтган ҳафта Конго ДР ҳудудида Эбола вирусининг «Бундибужио» штамми тарқалиш хавфи «ўта юқори» даражада эканидан огоҳлантирган эди. Сўнгги тиббий маълумотларга кўра, айни пайтда ушбу мамлакатда 1000 дан зиёд касалланишга гумон қилиш ҳолатлари аниқланган ва вирус туфайли 246 та ўлим қайд этилган.

Конго ДР ҳукуматининг маълум қилишича, мамлакат футбол федерацияси (FECOFA) юзага келган инқирозли вазият юзасидан ФИФА билан шошилинч музокаралар олиб борган. Натижада делегацияни тўлиқ тиббий ва санитария протоколларига мослаштириш чоралари кўрилди. Хусусан, жамоанинг Киншаса шаҳрида режалаштирилган ўқув-машғулот йиғини бекор қилинди ва тайёргарлик жараёни зудлик билан мамлакат ташқарисига кўчирилди.

Терма жамоа ихтиёридаги футболчиларнинг катта қисми Европа яшил майдонларида тўп суриши вирус билан тўғридан-тўғри алоқа қилиш хавфини сезиларли даражада камайтиради. Шунингдек, ой бошида Киншасани тарк этган техник ходимлар ва жамоа расмийлари АҚШ санитария талабларига мувофиқ, Америкага учиб кетишдан олдин Европада камида 21 кунлик тиббий назоратдан ўтишади.

Бундан ташқари, Конго ҳукумати мундиал ўйинлари учун чипта харид қилган маҳаллий мухлислар тақдиридан ҳам хавотирда. Эпидемиологик вазият сабабли конголик ишқибозлар АҚШ визасини олишда жиддий маъмурий тўсиқларга дуч келишмоқда. Айни пайтда расмийлар чипталар учун сарфланган маблағни мухлисларга қайтариб бериш масаласида ФИФА билан музокара ўтказмоқда.

Эслатиб ўтамиз, орадан 52 йил ўтиб илк бор Жаҳон чемпионати йўлланмасига эга чиққан Конго ДР терма жамоаси турнир давомида АҚШнинг Хьюстон шаҳрида истиқомат қилиши белгиланган эди. Қуръага кўра, жамоа гуруҳ босқичида 17 июнь куни Португалия, 23 июнда Колумбия ва 27 июнь куни Фабио Каннаваро бошчилигидаги Ўзбекистон миллий терма жамоасига қарши майдонга тушади.