Зеленскийнинг яқин сафдоши рақибга айланди

Украина Қуролли кучларининг собиқ бош қўмондони, айни пайтда Буюк Британияда элчи вазифасида фаолият юритаётган Валерий Залужний мамлакат президентлиги учун сайловда ўз номзодини қўяди. У амалдаги президент Владимир Зеленскийнинг асосий рақиби бўлиши кутилмоқда.

“Украинская правда” нашри ёзишича, Валерий Залужний жорий йил июн ойи ўрталарида Киевга чақирилган. Президент Владимир Зеленский у билан аввало Британиядаги вазият хусусида суҳбатлашган.

Суҳбат давомида Зеленский президентлик сайловидан ҳам гап очган ва Залужнийдан агар куз ойларида сайлов ўтказилгудек бўлса, номзодини қўйиш-қўймаслигини сўраган.

Залужний сайловда қатнашиш ниятида эканини тасдиқлаган. Аввал сиёсий карьерага интилмагани, аммо кўплаб инсонлар унга умид боғлаётгани сабаб билдирилган ишончни эътиборсиз қолдира олмаслигини қайд этган.

Зеленский Залужнийга ҳар қандай давлат лавозимини таклиф этишга тайёр бўлган, аммо “Ҳа, сайловда қатнашаман” деган жавобдан кейин ниятидан воз кечган.

“Украинская правда” нашрига кўра, Зеленский ҳамда унинг маъмурияти Залужнийни сайловда қатнашмасликка кўндиришга уринган.

Киевда Залужний билан президентнинг икки вакили – Украина Миллий хавфсизлик ва мудофаа кенгаши котиби Рустем Умеров ҳамда Олий Рададаги президент фракцияси раҳбари Давид Арахамия ҳам учрашган. Улар Зеленскийнинг жамиятдаги эҳтимолий бўлиниш ҳақидаги далилларини такрорлаб, Залужнийдан сайлов борасидаги позициясини ўзгартиришни сўраганлар. Аммо Залужний ниятида собит эканини таъкидлаган. Умеров ва Арахамия хайрлашаётганда ҳам Залужнийдан яна бир бор ўйлаб кўришни илтимос қилишган.

Генерал Валерий Залужний 2021 йилнинг июль ойида, Россия босқинидан ярим йил олдин Украина армияси бош қўмондони этиб тайинланган эди. Ўшанда шахсан Зеленский ташаббуси билан амалга оширилган ушбу тайинлов кўпчилик учун кутилмаган ҳол бўлган эди.

Россиянинг 2022 йил 24 февралдаги ҳужумидан кейин Залужний миллий қаҳрамонга айланди: унинг қўмондонлигида Киев ва Украинанинг кўплаб шаҳарлари рус босқинидан ҳимояланишга муваффақ бўлди.

Украина қўшини мудофаадан муваффақиятли қарши ҳужумга ўтиб, Харьков вилоятини озод қилгач, Залужний номи шижоат ва қатъият рамзига айланди.

Бироқ 2024 йилнинг февралида Зеленский Украина армияси раҳбариятини янгилаш вақти келганини айтиб, “темир генерал”ни лавозимидан бўшатди.

Ўшанда Зеленский ўз сафдошининг халқ орасида обрў-эътибори ошиб бораётганидан хавотирланган ҳолда ишдан бўшатгани ҳақида овоза тарқалганди.

Истеъфодан кейин Залужний Украинанинг Буюк Британиядаги элчиси этиб тайинланди ва у ҳозиргача ушбу вазифани бажариб келмоқда.

Украинанинг энг ишончли иттифоқчиларидан бири бўлмиш Буюк Британияга элчи этиб тайинланган Залужний ўз обрў-эътиборини сақлаб қолмоқда.

Ижтимоий сўров натижаларига қараганда, Харьков шаҳри мэри Игорь Терехов, Украина учувчисиз кучлар тизими командири Роберт Бровди каби ҳарбий ва сиёсий арбобларнинг ҳам рейтинги юқори.

Яна бир ёш генерал – Украина мудофаа вазирлиги Разведка бош бошқармасининг собиқ раҳбари, ҳозирда президент офиси раҳбари Кирилл Будановнинг ҳам нуфузи баланд.

Ҳозирча уларнинг бирортаси президентлик сайловида қатнашиш истагини билдирганича йўқ.